Zeınetaqy qorynan aqsha bólý kezinde quny sharyqtaı kóterilgen jyljymaıtyn múlik naryǵy birtindep óz qalpyna túse bastaıtyn sııaqty. Sarapshylardyń pikirleri osyndaı oıǵa jeteleıdi.
Bul týraly Telegram-daǵy Risk Takers kanalynda qozǵalyp, Almatyda baspana sharshy metriniń ortasha baǵasy jyl basynan beri 459,9 myńnan 518,1 myń teńgege deıin óskeni sóz boldy.
«Indeks 12,65 paıyzǵa qymbattap otyr. Elordada da sondaı dınamıka baıqalady. Sondaı-aq sharshy metr qunynyń ósýi oblys ortalyqtary men ózge de iri qalalarda tirkeldi. Indeks trendiniń oń jaǵdaıda qala berýi baǵa turaqtalýynyń áli de kesheýildeıtinin ańǵartatyndaı. Alaıda satý-satyp alý kelisimderi sanynyń azaıýy arqasynda baǵa ósimi baıaýlaýy múmkin. Memleket qurylysshylardy qoldaıtyn jańa mehanızm oılap shyǵarmaıdy dep úmittenemiz. Baǵa ósimi men onyń turaqtalýy qandaı da bir sharalar esebinen emes, taza naryqtyq tendensııalar áserimen rettelýi kerek», dep jazady atalǵan kanal sarapshysy.
Al Tengenomika kanalynyń jazýynsha, shilde aıynda jańa úıler baǵasy 0,4, ekinshi naryq úıleri 1,1, al arenda 0,6 paıyzǵa qymbattaǵan. Jyldyq mólsherde esepteıtin bolsaq, naryqtyń atalǵan segmentteri 12 aı ishinde 12,9%, 24,9% jáne 11,9%-ǵa ósken. Bul rette kanal sarapshysy 2021-diń jeti aıynyń qorytyndysyn eskergende baspana baǵasynyń uzaq merzimdi úrdisi men eldegi jalpy ınflıasııa (2012 jyldyń qańtarynan bastap) arasynda aıyrmashylyq ulǵaıyp bara jatqanyn aıtady.
«Ekinshi naryq úı baǵasynyń uzaq merzim boıǵy ósimi 2012 jyldan beri jınaqtalǵan ınflıasııadan 37 paıyzdyq pýnktke alda tur. Al jańa úılerdiń uzaq merzim boıǵy qymbattaý jyldamdyǵy jınaqtalǵan ınflıasııamen aradaǵy aıyrmany 2 paıyzdyq pýnktke deıin qysqartqan. Salystyrar bolsaq, byltyr jeltoqsanda jańa úıler baǵasynyń uzaq merzimdi ósýi jınaqtalǵan ınflıasııadan 10 paıyzǵa tómen bolǵan. Sońǵy ret mundaı jaǵdaı 2013-2016 jyldary baıqalyp edi. Ol kezde teńge baǵanynyń quldyrap ketýinen naryq qyzyp ketken bolatyn. Bizdiń baǵalaýymyz boıynsha, dál qazirgi sátte naryqtyń qyzyp ketýine BJZQ salymshylaryna qordaǵy artyq qarajatyn paıdalaný múmkindiginiń berilýi sebep boldy», dep jazady Tengenomika.
Qurylysshylar odaǵynyń basshysy Talǵat Erǵalıev baspana baǵasynyń shyrqap ketýine BJZQ áseri tıdi degen kózqaraspen kelispeıdi.
«Qazir qoǵamnyń jáne keıbir memlekettik organ basshylarynyń jyljymaıtyn múlik naryǵyndaǵy ahýaldy durys túsinbeı otyrǵanyn kórýdemiz. Prezıdent Q.Toqaevtyń bul bastamasy shyn máninde óte tıimdi jáne birazdan beri páterge qol jetkize almaı júrgen qazaqstandyqtar úshin tamasha múmkindik boldy. Qazaqstandyqtar qor qarjysynyń 40 paıyzǵa jýyǵyn ıpotekalyq zaımdaryn óteýge jáne emdeýge jumsady. Shamamen 60 paıyzy birinshi jáne ekinshi baspana naryǵyna kelip tústi. Qazir Qazaqstanda 162 myń páter satýǵa qoıylǵan. Bul – shamamen 11 mln sharshy metrden astam úı. Eger usynys kóp, al halyqtyń tólem qabileti tómen bolsa baǵa óspeıdi. Demek usynysqa qarap elimizde baspana tapshylyǵy joq ekenin ańǵaramyz. Sondyqtan baspana baǵasy zeınetaqy qarjysynyń kelýimen aspandady deýge de negiz joq. Moıyndaý kerek, azamattardyń zeınetaqy qarjysy satý-satyp alý kelisimderin kóbeıtken shyǵar, alaıda baǵaǵa áser etken joq. Baǵa ósimine barlyq qurylys materıaldarynyń qymbattaýy áserin tıgizdi. Qurylys materıaldarynyń qymbattaýy BJZQ qarjysynyń shyǵýymen tuspa-tus kelip qaldy», deıdi T.Erǵalıev.