Qazirgi kezde aýyl áıelderin qoldaý baǵdarlamasy aıasynda Qazaqstanda 81 áıel óz isin damytyp otyr. Respýblıkalyq komıssııanyń sheshimimen olarǵa grant berildi. Bul týraly Ortalyq kommýnıkasııalar qyzmetinde ótken brıfıngte Qazaqstannyń aýyl áıelderi forýmyn uıymdastyrý komıtetiniń tóraıymy Maıra Aısına málimdedi, dep habarlaıdy Egemen.kz OKQ-ǵa silteme jasap.
Onyń aıtýynsha, úmitkerler ótinim bergen soń, komıssııa músheleri saraptama jasap, sheshim shyǵarady.
«Jyl saıyn 3 myńǵa jýyq áıel ótinishterin beredi, biz olarǵa bıznes jobalardy jazýǵa kómektesemiz, al grant alǵannan keıin súıemeldep otyramyz. Qazir 81 áıel jumys istep jatyr, olar 200-ge jýyq jańa jumys ornyn ashty. Biz olarmen udaıy baılanysta bolyp, jumystaryn odan ary jalǵastyrýǵa kómektesemiz. Kúndelikti habarlasyp otyramyz», dedi M.Aısına.