QR Eńbek jáne halyqty áleýmettik qorǵaý vıse-mınıstri Erjan Birjanov eldegi jumyssyzdyq deńgeıi jóninde aıtyp berdi, dep habarlaıdy Egemen.kz.
«Jumyssyzdar sanatyna qazirgi ýaqytta eńbek kelisimderi joq, jumys izdep júrgen jáne jumysqa kirisýge daıyn adamdar jatady. Statıstıka bıýrosyna júrgizilgen taldaý negizinde búgingi tańda Qazaqstanda 451 myń jumyssyz tirkelgen. О́tken jyldyń sáıkes kezeńimen salystyrǵanda jumyssyzdyq 2,6 myń adamǵa azaıdy», dep túsindirdi vıse-mınıstr.
Erjan Birjanov jumyssyzdar sanatyna jatqyzýdyń eki tártibi bar ekenin atap ótti.
«Birinshisi - statıstıka organdarynyń saýalnamasyna sáıkes irikteý. Bul halyqaralyq tájirıbe barlyq elderde qoldanylady jáne Halyqaralyq eńbek uıymy usynǵan. Iаǵnı, statıstıka organdary saýalnama júrgizip, ár kezeńge sandardy shyǵarady. 4,9 kórsetkishi - bul statıstıka organdarynyń derekteri. Vedomstvolyq statıstıka da bar. Bul bizdiń qyzmet kórsetý ortalyqtaryna jumyspen qamtý ortalyqtaryna keletin jáne tirkeletin tulǵalar. Búginde olardyń sany 223 myń», dedi Erjan Birjanov.
Jumyspen qamtý ortalyqtarynda jumyssyz retinde tirkelý úshin tek jeke kýálik qajet. Búgingi tańda onlaın rejıminde de tirkelýdi júzege asyrýǵa bolady.