Ulttyq bank ekonomıkanyń naqty sektoryndaǵy kásiporyndar arasynda saýaldama júrgizip, ekinshi toqsandaǵy negizgi kórsetkishterdi anyqtaǵan. Onyń nátıjesi boıynsha, taý-ken ónerkásibinen jáne kólik pen qoımada saqtaý salasynan bólek barlyq salada daıyn ónimge degen suranys birshama nasharlap ketken. Saýaldamaǵa barlyǵy 2,6 myńnan astam óndirýshi men óńdeýshi ónerkásip, qurylys, saýda, aýyl sharýashylyǵy, kólik jáne qoıma ustaýshy kásiporyndar qatysqan.
Aqsha-nesıe saıasaty departamentiniń dırektory Jandos Shaımardanovtyń aıtýynsha, suranystyń ósý qarqynynyń baıaýlaýy ásirese, óńdeý ónerkásibinde, saýdada, qurylysta qatty baıqalady. Aýyl sharýashylyǵy boıynsha suranys kórsetkishi teris aımaqqa aýysqan. Úshinshi toqsanda suranys ósse, ol tek aýyl sharýashylyǵynda ósedi degen boljam bar, al basqa salalarda ósý baıaýlap, tipti tómendep ketýi de múmkin.
«2021 jyldyń ekinshi toqsanynda shıkizat, materıaldar men daıyn ónim baǵasynyń ósý qarqyny jedeldeı túskeni barlyq salada baıqaldy. 2021 jyldyń úshinshi toqsanynda baǵanyń ósý qarqyny baıaýlaıdy dep kútilýde. Sóz bolyp otyrǵan salalarda óndiris kólemi ulǵaıyp, dıffýzııalyq ındeks ósý salasyna ótti. О́ńdeý ónerkásibinde eń joǵary ósim bar. 2021 jyldyń úshinshi toqsanynda bul salada da ósý qarqyny báseńdeıdi dep kútilýde» deıdi J.Shaımardanov.
Atalǵan salalarda básekelestik deńgeıi joǵary. Saýda kásiporyndary naryqtyq básekelestiktiń yqpalynan shyǵa alar emes, munda kásiporyndardyń 40,1 paıyzy óz bıznesine qatysty básekelestiktiń áserin sezdi degen oı aıtady ol. О́ńdeý ónerkásibinde mundaı kásiporyndardyń úlesi – 31,6, kólik salasynda – 25,6, qurylys salasynda 24,9 paıyzǵa jetedi eken. Aýyl sharýashylyǵy men taý-ken ónerkásibinde eń az úles (18,2 jáne 16,1 paıyz) baıqalǵan.
Sonymen qatar el ekonomıkasynyń jaı-kúıine qanaǵattanbaý – kásiporyndardyń basym bóliginiń iskerlik belsendiligin tejeıtin basty kedergige aınalǵan. Ulttyq banktiń zertteýinde óńdeý ónerkásibi men saýda salasynyń ónimge degen suranysqa baılanysty eleýli problemalardy (30,9 jáne 27,6 paıyz) bastan keship otyrǵany aıtylady. Aýyl sharýashylyǵy men óńdeýshi kásiporyn jetekshileri bilikti kadrlardyń tapshy ekenin alǵa tartqan.
«Kelesi 12 aıda barlyq sala boıynsha qarjylandyrý kólemi burynǵy qalpynda saqtalady. Bul rette óńdeý jáne taý-ken óndirý ónerkásibi barynsha molyraq qarjylandyrylyp, kerisinshe, qurylys pen saýdada az qarjy bólinedi degen jospar bar» deıdi J.Shaımardanov.