Qazaqstannyń ulttyq joǵary oqý ornynda vırýsolog-mamandar daıarlanady, dep habarlaıdy Egemen.kz QR Bilim jáne ǵylym mınıstrliginiń baspasóz qyzmetine silteme jasap.
«Ál-Farabı atyndaǵy QazUÝ bıologııalyq qaýipsizdik problemalarynyń ǵylymı-zertteý ınstıtýtymen (BQPǴZI) birlese otyryp, vırýsolog-mamandardy daıarlaıtyn bolady. Áńgime magıstranttar men doktoranttar týraly bolyp otyr. Tıisti tapsyrmany Bilim jáne ǵylym mınıstri Ashat Aımaǵambetov taǵaıyndady. Ol pandemııa epıdemıologııa jáne vırýsologııa salasyndaǵy mamandardy daıarlaý qajettiligin atap ótti», delingen habarlamada.
Sondaı-aq, vedomstvoda QR BǴM BQPǴZI qyzmetkerleri qazaqstandyq Covid-19 vaksınasyn ázirlegenin eske saldy. Ulttyq joǵary oqý ornynyń rektory J.Túımebaev pen bıologııalyq qaýipsizdik problemalary ǴZI bas dırektory K.Zakarııa tıisti kelisimge qol qoıdy. Qazir QazUÝ BQPǴZI-men birlesip vırýsologııa salasynda jańa bilim berý baǵdarlamasyn ázirledi.
«Qazaq ulttyq ýnıversıteti bıologııalyq qaýipsizdik problemalarynyń ǵylymı-zertteý ınstıtýtymen alǵash ret birlesip, vırýsolog-mamandardy daıarlaıtyn bolady. Buryn bakalavrıattyń uqsas bilim berý baǵdarlamalaryn oqyǵan joǵary oqý oryndarynyń túlekteri oqı alady. Olar QazUÝ bıologııa jáne bıotehnologııa fakýltetiniń bazasynda jáne BQPǴZI BSL-2 jáne BSL-3 zerthanalarynda bilim alatyn bolady. Vırýsologtardy daıarlaý kezinde stýdentterdiń teorııalyq ǵana emes, sonymen qatar praktıkalyq bilim alýyna basty nazar aýdarylady. Jetekshi vırýsologtar zertteý men dıagnostıkany qalaı júrgizý kerektigin, vırýstyń jańa túrlerin qalaı anyqtaý kerektigin kórsetedi. Sondaı-aq, bilim alýshylar molekýlıarlyq bıologııa, bıohımııa, mıkrobıologııa ádisterin meńgeredi», dep atap ótti Bilim jáne ǵylym vıse-mınıstri Qýanysh Erǵalıev.
Praktıkalyq sabaqtar basym bolǵandyqtan, stýdentter BQPǴZI bazasynda tájirıbeden jáne taǵylymdamadan ótedi. Instıtýt ǵalymdary, sonyń ishinde koronavırýsqa qarsy vaksına jasaǵandar vırýsologııa, bıologııa jáne bıotehnologııa salasynda praktıkalyq sabaqtar, master-klastar, semınarlar ótkizedi. Oqýdy aıaqtaǵannan keıin, jaqsy bilimdi kórsetken jaǵdaıda, túlekterdi bıologııalyq qaýipsizdik problemalary ǵylymı-zertteý ınstıtýtyna jumysqa ornalastyrýǵa bolady.
Budan ári bıologııalyq qaýipsizdik problemalary ǴZI bazasynda doktorlyq jumystardy qorǵaý jónindegi dıssertasııalyq keńes qurylatyn bolady. Ǵylymı-zertteý jumystaryn júrgizý kezinde ádistemelik-konsýltasııalyq sıpattaǵy kómek kórsetý úshin sheteldik ǵalymdardy tartý kózdeledi.
Sondaı-aq, mınıstrliktiń baspasóz qyzmeti bıologııalyq qaýipsizdik problemalary ǵylymı-zertteý ınstıtýtynyń bıologııalyq qaýipsizdik, bıotehnologııa, vırýsologııa, mıkrobıologııa, ımmýnologııa salasynda úlken tájirıbesi bar ekenin atap ótti. Instıtýt ǵalymdary preparattardyń 60-tan astam ataýyn, onyń ishinde 30 vaksınany, 16 test-júıeni jáne 15-ten astam túrli bıopreparattardy ázirlep, engizdi. Sońǵy 10 jylda ınstıtýt asa qaýipti ınfeksııalar boıynsha vaksınalardy, onyń ishinde otandyq QazVac vaksınasyn daıyndaý tehnologııasyn jasady.