QR Premer-mınıstri Asqar Mamın azyq-túlikke jatpaıtyn taýarlarǵa ınflıasııa deńgeıin tejeý boıynsha josparlanǵan sharalar týraly aıtty, dep habarlaıdy Egemen.kz.
«Azyq-túlik emes taýarlarǵa ınflıasııa deńgeıin tejeý jónindegi sharalar sheńberinde qajet bolǵan jaǵdaıda ishki naryqta tapshylyq ne baǵanyń ósýi baıqalatyn shıkizat pen materıaldar eksportyna shekteýler engizý kózdeledi», dedi Asqar Mamın Úkimet otyrysynda.
Budan basqa, medısınalyq qyzmetterge keshendi tarıfterdi jáne birqatar medısınalyq taýarlarǵa shekti baǵalardy aldyn ala bekitý qamtamasyz etiledi.
«Inflıasııa ımportynyń deńgeıi joǵary óndiristerdi, onyń ishinde qurylys materıaldary men jeńil ónerkásip ónimderin ósirý boıynsha naqty sharalar iske asyrylatyn bolady. Aqsha-kredıt saıasaty sheńberinde ınflıasııaǵa qarsy sharalardy iske asyrýǵa, onyń ishinde ekonomıkadaǵy ótimdilik kólemine baqylaýdy kúsheıtý arqyly fokýs kúsheıtiletin bolady», dep atap ótti Premer-mınıstr.
«Bul sharalardyń barlyǵy aǵymdaǵy jyldyń sońyna deıin jedel tártippen azyq-túlik emes taýarlar men aqyly qyzmetterdiń baǵalaryn turaqtandyrýǵa jáne ınflıasııanyń jalpy deńgeıin baqylaýdy qamtamasyz etýge múmkindik beredi», dep tolyqtyrdy Asqar Mamın.