Memleket basshysy N.Nazarbaevtyń «Qazaqstan joly – 2050: bir maqsat, bir múdde, bir bolashaq» atty Joldaýyna ún qosý, onda aıtylǵan mindetter men baǵyttardy zerdeleý, soǵan oraı óńirlerde jasalatyn jumystardy baǵamdap, pysyqtap alý úshin túrli jıyndar ótýde. Mańǵystaý oblysy ákimdiginde ótken aktıv jınalysynyń ózegi men órbiteri de Joldaý boldy.
Memleket basshysy N.Nazarbaevtyń «Qazaqstan joly – 2050: bir maqsat, bir múdde, bir bolashaq» atty Joldaýyna ún qosý, onda aıtylǵan mindetter men baǵyttardy zerdeleý, soǵan oraı óńirlerde jasalatyn jumystardy baǵamdap, pysyqtap alý úshin túrli jıyndar ótýde. Mańǵystaý oblysy ákimdiginde ótken aktıv jınalysynyń ózegi men órbiteri de Joldaý boldy.
– Joldaýdyń basymdyqtary Elbasynyń turaqty damýshy memleket qurýǵa degen saıası baǵytynyń birizdiligin kórsetti. Joldaý – josparlaý saıasaty, uzaqmerzimdi damý men ekonomıkalyq ósýdi maqsat etken «Máńgilik Elimizdiń» taǵy bir strategııalyq jospary. Onda uzaqmerzimdi baǵyt-baǵdarlar, el damýynyń aldaǵy qysqa merzimdi kezeńge arnalǵan basym baǵyttary aıqyndalǵan. Bul jospar bizdiń damyǵan 30 eldiń qataryna kirý jolyndaǵy isterimizge jańa serpin bereri sózsiz, – dedi oblys ákimi A.Aıdarbaev.
Joldaýda naqty mindetter qoıyldy. Mindetterdi oryndaýǵa jáne júzege asyrýǵa bolady. Ol úshin barlyq alǵysharttar bar. Sol sebepti, ony múltiksiz, sapaly jáne tolyq iske asyrý maqsatynda depýtattyq korpýspen, barlyq deńgeıdegi ákimdermen, úkimettik emes sektormen, qoǵamdyq uıymdarmen birge aıqyn is-qımyl josparyn jasap shyǵarý, basymdyqtardy anyqtaý, Joldaýdyń ár tarmaǵy boıynsha naqty ındıkatorlar belgileý qajet. Osylaı dep oıyn sabaqtaǵan oblys basshysy aýdan, qala ákimderi, salalyq basqarmalar basshylary, depýtattar, úkimettik emes uıymdar músheleri, etnomádenı birlestikter ókilderi, jastar jáne BAQ ókilderi qatysqan aýqymdy jıynnyń baǵyt-baǵdaryn aıqyndap berdi. Odan ári Joldaýda kórsetilgen basym jáne basty baǵyttarǵa jeke toqtalyp, olardyń Mańǵystaý óńirinde júzege asý múmkindikterin tarqata sóılegen A.Aıdarbaev Elbasy tapsyrmalaryn oryndaýdyń aımaqtaǵy naqty tetikterin ortaǵa saldy.
Joldaýdaǵy geologııalyq barlaý júrgizý tapsyrmasy Mańǵystaýdyń saıyn dalasyna soqpaı ketpeıdi. Geologııalyq boljam boıynsha, elimizdegi jalpy munaı qorynyń 25 paıyzy, ıaǵnı 2,6 mlrd. tonnasy Mańǵystaý jerinde. Jańaózen qalasy mańyndaǵy Qansý jerindegi kógildir otyn qory 20 mlrd. tekshe metr dep esepteledi. Joldaýda aıtylǵan kómirsýtegi shıkizatyna qatysty tapsyrmaǵa oraı bıyl Qansýda geologııalyq barlaý jumystary bastalmaq. Sondaı-aq, elimizde tórtinshi munaı óńdeý zaýytyn salý máselesi de mańyzdy. «Ásirese, jańa zaýytty munaı-gaz salasyna mamandanǵan Mańǵystaýda salýdyń múmkindigi mol dep esepteımin. Sol sebepti, osy jobaǵa qatysty jumys tobyn qurýǵa tapsyrma berdim. Qazirgi tańda ǵalymdar, tájirıbeli munaıshylar, ekonomıster muraǵat qujattaryn zerdelep, munaı óńdeý zaýytyn salýǵa qatysty zertteýlermen aınalysýda», dedi A.Aıdarbaev.
Aktıv jınalysynda Joldaýdaǵy logıstıka salasy boıynsha Aqtaý portynyń qýatyn arttyrý tapsyrmasyna saı atalǵan portty soltústik baǵytqa keńeıtý jumystarynyń jalǵasa beretindigin bildik. Sonymen qatar, «Aqtaý arnaıy ekonomıkalyq aımaǵyn» jetildirý, kásipkerlik, áleýmettik salalardy órkendetý, ınvestısııa tartý, agroónerkásip keshenin ınnovasııalyq damytý baǵytyndaǵy atqarylar sharýalar tizbekteldi. Olardyń biri – Munaıly aýdany men Jańaózen qalasynan et óńdeý zaýytyn jáne qus fermasyn salý.
– Qazaq tiliniń bizdiń óńirimizde qoldaný aıasy óte aýqymdy. Alaıda, mekemelerde, ásirese, sheteldik kompanııalarda memlekettik tilde is júrgizý jumystarynyń mardymsyz ekenin bilemin, – degen oblys ákimi barlyq mekemelerdiń, sheteldik kompanııalardyń basshylaryna isqaǵazdaryn memlekettik tilge kóshirýdi, óz qyzmetkerlerine turaqty túrde qazaq tili kýrstaryn ótkizýdi tapsyrdy.
Joldaýdyń júgi – eldiń júgi, joly – eldiń joly. Sondyqtan, ony birlese kóterip, jumyla áreket etý shart. Jıynda sóz alǵan ár býyn, ár ult ókilderiniń sózi osyǵan saıdy.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.