Energetıka mınıstrligi Qazaqstanda dızel otynynyń tapshylyǵy bolmaıtynyn jetkizdi, dep habarlaıdy Egemen.kz.
Energetıka mınıstri Maǵzum Myrzaǵalıev Úkimet otyrysynda málim etkendeı, ishki naryqty dızel otynymen qamtamasyz etý úshin Pavlodar munaı-hımııa zaýytynda jóndeý jumystarynyń merzimin aýystyrý nemese qysqartý týraly másele kún tártibinde.
Budan basqa, janarmaıdyń, dızel otynynyń jáne munaı ónimderiniń basqa da jekelegen túrlerin Qazaqstan Respýblıkasynan tys jerlerge avtomobıl kóligimen áketýge tyıym salýdy kózdeıtin buıryqtyń qoldanylýyn taǵy 6 aıǵa uzartý týraly másele pysyqtalýda. Búginde energetıka, qarjy mınıstrlikteri men ulttyq qaýipsizdik komıtetiniń «QR aýmaǵynan munaı ónimderin áketýdiń keıbir máseleleri týraly» birlesken buıryǵy bar.
Sondaı-aq, Úkimet otyrysynda 2021 jyldyń qańtar-tamyz aılarynda 44 mln tonna munaı eksporttalǵany habarlandy. Maǵzum Myrzaǵalıevtiń aıtýynsha, munaı men kondensat 56,1 mln tonna óndirilgen, jospardyń ishinara oryndalmaýy Qarashyǵanaq jobasy boıynsha artta qalý esebinen oryn alǵan. Gazdyń da 35,5 mlrd tekshe metri óndirildi. Iri jer qoınaýyn paıdalanýshylardyń ishki qajettilikteriniń ósýi men taýarlyq gaz óndirisiniń azaıýy sebebinen 5 mlrd tekshe metr eksporttaldy.