Táńir maǵan...
Taǵdyr berdi, ot berdi,
sol otpenen jalyn-sezim kókke órdi;
sol otpenen óleń jazdym órtenip,
jyrǵa qosyp Qaradala, Bókterdi.
Kózde tunyp ózen men kól, qyr, baǵym,
júregimdi terbedi bir nurly aǵyn;
sol otpenen Táńirtaýǵa táý etip,
Alataýdy, Almatymdy jyrladym.
Aıaýlymnyń ustap alǵash bilegin,
sol otpenen kúıdim, jandym, túledim;
jyrǵa qosyp bútindigin Qazaqtyń,
ul-qyzymnyń amandyǵyn tiledim.
Kók pen Jerdiń shertip, terbep kúıin myń,
Altaı menen Aq Ertiske quıyldym;
sol otpenen Aq Jaıyqqa shomylyp,
kári Seıhun...
Qarataýǵa syıyndym...
Ǵasyrlardy oısha kezip men ótken,
Babalardy túgendedim sol otpen.
Sol otpenen Saryarqany aıqaryp,
Atyraýdy súıdim kelip jel ópken.
Sol otpenen Ereýilge tas úıdim,
sol ot bolyp tamyrymda tasıdy ún.
Ulytaýdy... Kezip únsiz Kóksheni,
sol otpenen Túrkistanǵa bas ıdim.
Júregimde – bir tátti muń, kermek ún,
sol otpenen boz dalany terbedim;
sol otpenen jyrǵa qostym Ileni,
Sharyn menen Sherqalanyń órnegin.
Bar qazaqqa tartý etken Sóz basyn
elestetsem...
Qalaı qanym qozbasyn?!
Uly Abaıǵa,
Shyńǵystaýǵa oralyp,
súrttim jyrmen Tamshalynyń kóz jasyn.
Maıqy bıden jetken aman Sóz bar-dy,
Túrkilerden qalǵan aman Kóz bar-dy...
Alashymnyń ata jurty keýdemde
sol otpenen qulpyryp san qozǵaldy.
Qarqynymen jalt qaratar Jurtymdy,
silkindirdi qaqyratyp Jyr túndi.
Iа, Jasaǵan!
Máńgi ete gór Elimdi,
sol otpenen kókiregim jyrtyldy.
Sol otpenen qoldy jaıyp órime,
saýlyq tilep Astanadaı tórime;
Táńirime...
Taǵdyryma bas ıdim,
Taǵzym ettim Uly Qazaq Jerine!
Nurlan ORAZALIN,
Qazaqstan Respýblıkasy
Memlekettik syılyǵynyń
laýreaty.