Qostanaıda aýdan, qala ákimderi, oblys ákiminiń orynbasarlary úshin «Qalalar men aýdandar ákimderiniń áleýmettik saladaǵy jumysynyń negizgi baǵyttary» atty arnaıy eki kúndik semınar ótti.
Partaǵa otyrǵan ákimderdiń aldynda mektep oqýshysyndaı nemese stýdentterdeı qalamsaby men dápteri, tipti Memlekettik qyzmetshilerdi qaıta daıarlaý jáne olardyń biliktiligin arttyrý jónindegi óńirlik ortalyqtyń Qazaqstan Respýblıkasy Memlekettik qyzmet isteri jónindegi agenttigi Qostanaı oblysy boıynsha departamentimen birlesip shyǵarǵan quqyqtyq aktiler normalarynyń jınaǵy jáne «Memlekettik qyzmettegi janjaldardy retteý» atty ádistemelik oqýlyq jatty. Ákimder eki kún boıy oqý baǵdarlamasynda bıýdjetti qurý, sýbsıdııalarmen jumys jáne memlekettik satyp alýdy durys ótkizý, pysyqtaý sııaqty taqyryptardy qamtydy. Semınardyń ashylýyna oblys ákimi Nuraly Sádýaqasov qatysyp, áriptesterine mundaı semınardyń bereri mol ekendigin aıtty.
– Semınardy eki kún emes, odan da uzaq ótkizýge bolar edi. Biraq qystaǵy kóp jumystar, tyıylmaı turǵan boran oǵan mursha bermedi. Degenmen, bul semınar ákimder jumysynda kezdesetin kóp jaılardy pysyqtap alýǵa kómektesedi dep oılaımyn jáne bul aldaǵy ýaqytta jalǵasyn tabatyn bolady, –dedi Nuraly Mustafauly.
Oblysta birinshi ótip otyrǵan bul semınarda ákimderge basqarmalar basshylary, zańger mamandar, qor jetekshileri leksııa oqydy, olar ınteraktıvti taqtany paıdalana otyryp, tıisti taqyrybyn búge-shigesine deıin túsindirdi. Ákimderdiń suraqtaryna jaýap berdi.
Eki kúndik semınar ákimder úshin naǵyz pikir almasý alańyna aınaldy. Trenıng ótkizildi. Semınarǵa qatysýshylar moderatorlar men spıkerlerge, ıaǵnı mamandarǵa oıyndaǵy ótkir máselelerdiń barlyǵyn suraq túrinde qoıa aldy. Mysaly, qazir shaǵyn jáne orta bıznesti damytý – barlyq óńirdegi eń ótkir máselelerdiń biri. Osy jóninde de semınarda qyzyqty, talasty pikir almasý boldy. Negizi, semınarda talqylanǵan, ákimder oqyp, pysyqtaǵan máselelerdiń barlyǵy da Elbasy Nursultan Nazarbaevtyń bıylǵy «Qazaqstan joly – 2050: bir maqsat, bir múdde, bir bolashaq» atty Joldaýynan týyndaǵan bolatyn. Ákimder semınarda Joldaýdy talqylaýǵa da ýaqyt tapty.
Semınar sońynda oblys ákimi semınarǵa qatysqan ákimderge sertıfıkat jáne osyǵan deıin aýdandyq, qalalyq ákimder orynbasarlary, mamandar úshin tájirıbe almasý alańdaryn uıymdastyrǵan aýdan, qala ákimderine alǵys hat tapsyrdy.
Názıra JÁRIMBETOVA,
«Egemen Qazaqstan».
QOSTANAI.