2021 jyldyń 2 qazanynda Jambyl oblystyq Polısııa departamenti Esirtki qylmysyna qarsy is-qımyl basqarmasynyń qyzmetkerleri «Qarasora-2021» respýblıkalyq jedel-aldyn alý is-sharasyn ótkizý barysynda Shý aýdanynan 100 shaqyrym jerde 27 jastaǵy jergilikti turǵyndy esirtki zattaryn daıyndaý kezinde ustady, dep jazady Egemen.kz.
Bul týraly Jambyl oblystyq PD baspasóz qyzmeti habarlady.
Sol mańdaǵy aýmaqty tekserý kezinde jas jigitten salmaǵy 60 keli 440 gr bolatyn «kannabıs ósimdigi» esirtki zaty tabylyp, tárkilendi. Sondaı-aq jedel-izdestirý is-sharalaryn júrgizý kezinde esirtki zatyn satýshydan jalpy salmaǵy 103 keli 240 gr «keptirilgen marıhýana» esirtki zatynyń 10 qaby tárkilendi. Kúdikti bul qaptardy jaz mezgilinde eldiń soltústik aımaqtaryna jetkizý úshin daıyndaǵan jáne jasyrǵan.
«Ustalǵan azamat kinásin moıyndady. Shý qalasynyń Ýaqytsha ustaý ızolıatoryna qamaqqa alyndy. QR Qylmystyq kodeksiniń 296-baby 4-bóligi («Esirtki, psıhotroptyq zattardy, sol tektesterdi ótkizý maqsatynsyz asa iri mólsherde zańsyz daıyndaý, qaıta óńdeý, satyp alý, saqtaý, tasymaldaý») boıynsha sotqa deıingi tergeý amaldary bastaldy, qylmystyń bul túrimen úsh jyldan jeti jylǵa deıingi merzimge bas bostandyǵynan aıyrý túrindegi jaza qoldanylady», delingen habarlamada.
Qazirgi ýaqytta qylmystyq áreketti QR QK-niń 297-baby 3-bóligimen qaıta saralaý qarastyrylýda. Bul qylmysty jasaǵany úshin múlki tárkilenip, on jyldan on bes jylǵa deıingi merzimge bas bostandyǵynan aıyrý túrindegi jaza qarastyrylǵan.
Sondaı-aq bıyl jyl basynan beri Jambyl oblystyq PD Esirtki qylmysyna qarsy is-qımyl basqarmasynyń qyzmetkerleri zańsyz aınalymnan 3 tonna 293 keliden astam, onyń ishinde 800 gr geroın, 103 keli gashısh, 3 tonnadan astam marıhýana sekildi túrli esirtki zattary tárkilendi.
Sonymen qatar Jambyl oblysynda shamamen 550 ga aýmaqta jer jyrtý, shabý jáne órteý joldarymen 40 tonnadan astam jabaıy qarasora joıyldy.