Atbasar qalasynda osyndaı oqıǵa oryn aldy degende jaǵamyzdy ustaǵanbyz. Biraq, oǵan esh tańǵalýdyń qajeti joq eken. Jasy eńkeıgen shaldyń eki qyzy buǵan deıin esirtki bıznesimen aınalysqany úshin sottalyp, túrmede jazalaryn ótep júrgenin bildik.
Otbasylyq qylmystyq kásipti jalǵastyrǵan jazǵan shal geroındi satyp turǵan jerinde quryqtalǵan. Jergilikti polısııa qyzmetkerleri onyń úıin tintý barysynda, kereýettiń astyna jasyrylǵan geroınniń qomaqty bóligin tapty. Tárkilengen qatty áserdegi esirtkiniń jalpy salmaǵy 145,42 gramdy tartady. Bul asa úlken kólemdegi apıyn sanalady.
Búgingi kúni QR QK 257-babynyń 3-bólimimen (esirtki zattaryn zańsyz satqany úshin) qylmystyq is qozǵaldy.
Baqbergen AMALBEK,
«Egemen Qazaqstan».
Aqmola oblysy.