Tarıhty zerdelegen

Qostanaıdaǵy «Dostyq úıinde» A.Baı­tursynov atyndaǵy Qostanaı memlekettik ýnıversıteti fılosofııa kafedrasynyń meńgerýshisi, fılosofııa ǵylymdarynyń doktory, professor Sapar Qoldybaevtyń «Tarıhı úderisterdiń fılosofııalyq-epıs­­temologııalyq problemalary» atty kitabynyń tusaýkeseri bo­lyp ótti. Qos­tanaı oblysy ákimdiginiń ishki saıasat bas­qarmasy jáne Qazaqstan hal­qy assam­bleıa­sy oblystyq fılıalynyń uıymdas­­tyrýymen ótken bul sharaǵa tarıhshy ǵa­lym­darmen birge zııaly qaýym, stýdent jas­tar qatysty. Tusaýkeser keshti ashqan oblystyq ishki saıasat basqarmasynyń basshysy Jan­­dilda Ma­qanov «Tarıhı úderisterdiń fılo­sofııalyq-epıs­temologııalyq problemalary» kitabynyń ja­ryqqa shyǵýyn ulttyq sanaǵa sáýle túsirer oqı­ǵa dep baǵalady. Tórt-bes jyl boıy jaz­ǵan monografııasynda belgili ǵalym Sapar Qol­­dybaev ulttyq tarıhty jazýdyń teorııasy men fılosofııasyna jańa kózqaras turǵysynan keledi. – Men buryn quqyq fılosofııasymen aınalysqan edim. Meni sońǵy jyldary tarıh fılosofııasy qyzyqtyrdy, men sony zerttedim. Tarıh fılosofııasy búginde nege ótkir tur? Otandyq tarıhty teorııalyq-ádisnamalyq qaıta zerdeleý Qazaqstannyń memlekettik-etnıkalyq ózin ózi anyqtaý, bıleý, kópǵasyrlyq ózindik damý tarıhy bar baıyrǵy ult qazaq múddelerin negizge alý turǵysynan júrgizilýi kerek. Búginde Otan tarıhynyń damýyn tarıhı tanýdyń ádisnama salasynyń mańyzdy bir bóligi bolyp tabylatyn tarıh fılosofııasynyń máseleleri jete jasalmaǵandyǵy erekshe sezilip tur. Bárimizge málim jáne tolǵandyryp júrgen másele, áli kúnge deıin otandyq fılosofııa otandyq tarıhı úderisiniń dúnıetanymdyq, irgeli máselelerin qajetti deńgeıde qaıta zer­deleı ala almaı otyrǵandyǵy, sonyń ishin­de, biz, qazaqtar, kimdermiz, dúnıejúzilik tarıh­ta qandaı oryn alamyz, bizdiń arǵy atala­rymyzdyń tarıhta qandaı róli bolǵan degen sııaqty saýaldarǵa jaýap berilmegendigi, – dedi kitap avtory Sapar Qoldybaev. Kitaptyń tusaýkeser keshinde ǵalymnyń áriptesteri V.Gershýn, T.Nurtazenov, A.Aıt­muhambetov, E.Ábil jáne basqalar tarıh fılosofııasy men teorııasyn zerdeleýge arnalǵan jańa shyǵarma jóninde jyly pikir bildirdi. Olar «Tarıhı úderisterdiń fılosofııalyq-epıstemologııalyq prob­lemalary» kitabyn qazaq halqynyń jáne Qazaqstan tarıhyn ja­ńa kózqaraspen zerdeleýge qosylǵan súbeli úles jáne qundy eńbek dep baǵalady. Kitapty Ra­rıtet baspa kompanııasy 2000 danamen shyǵardy. Názıra JÁRIMBETOVA, «Egemen Qazaqstan». QOSTANAI.