Keshe Ortalyq kommýnıkasııalar qyzmetinde Kedendik baqylaý komıteti tóraǵasynyń orynbasary Amanııaz Erjanov baspasóz máslıhatyn ótkizdi. Ol komıtettiń qyzmeti jóninde baıandap, teńge baǵamynyń ózgerýine de toqtaldy.
– Qazirgi tańda keden organdary ákimshilendirý tıimdiligin arttyryp, kedendik rásimderdi jeńildetý jáne jyldamdatý, sondaı-aq, olardyń aıqyn bolýyn qamtamasyz etýdi qolǵa alǵan. Bir sózben aıtqanda, keden qyzmetin tolyq jańǵyrtýǵa nazar aýdaryp otyr. Sondyqtan saladaǵy basym baǵyttardy belgilep, fıskaldyq jáne quqyq qorǵaý fýnksııalaryn júzege asyryp, kedendik resimdeý men baqylaý tehnologııalaryn jetildirmek. Sóıtip, júıege sońǵy úlgidegi aqparattyq-kommýnıkasııalyq tehnologııalardy engizbek, – dedi tóraǵa orynbasary.
Teńge baǵamynyń túzetilýi keden sheginde eshqandaı dúrbeleń týdyrmapty. «Valıýta baǵamyn ózgertýge qatysty birde-bir keleńsiz oqıǵa bolǵan joq. Kedendik tazartý Keden odaǵy men elimizdiń zańnamasyna sáıkes júrgizilýde. О́tken 11-13 aqpan kúnderi ótkizý pýnktterinde syrtqy ekonomıkaǵa qatysýshylardyń irkilip, jınalyp qalýy oryn almady. Barlyq ótkizý pýnktteri osy ýaqytqa deıin qalaı jumys istep kelgen bolsa, áli de sol rejimmen qyzmetin jalǵastyryp jatyr», dedi A.Erjanov.
Tóraǵa orynbasary sońǵy kezderi syrtqy saýda aınalymynyń óskenin de aıtyp ótti. Mysaly, ótken jyly syrtqy saýda aınalymy 107,1 mlrd. AQSh dollaryna jetipti. Onyń 76,6 mlrd. dollaryn eksport qurasa, 30,5 mlrd. dollary ımportqa tıesili eken. Jalpy, saýda balansynyń saldosy 46,1 mlrd. AQSh dollary deńgeıinde qalyptasypty. Osy kórsetkishterdi saralaı kelgende, eksporttyq kedendik baj jáne ımportqa qosymsha qun salyǵy boıynsha kedendik túsim kóbeıedi dep kútilip otyr eken.
Nurbaı ELMURATOV,
«Egemen Qazaqstan».