Elimizde alkogolsiz sýsyndardyń túpnusqalyǵyn tekserýge arnalǵan qoǵamdyq baqylaý quraly synaqtan ótýde. Qazaqstanda tutynýshylarǵa satyp alynatyn sý men quramynda qant bar sýsyndardyń túpnusqalyǵyna sıfrly tańbalaýdy engizý arqyly kepildik berý josparlanýda. Qazir qanatqaqty joba júrip jatyr. Oǵan qaptalǵan sýdy óndiretin birqatar kompanııa qosylǵan.
Bizdiń eldegi qaptalǵan sý men quramynda qant bar sýsyndardy tańbalaý jónindegi qanatqaqty jobaǵa Eýrazııalyq ekonomıkalyq odaq elderiniń kelisimi negizinde Aýyl sharýashylyǵy mınıstrligi bastamashylyq etken. Taýarlardy tańbalaý men qadaǵalaýdyń biryńǵaı operatory – Sıfrly ekonomıkany damytý ortalyǵynyń ókili Erlan Nurmaǵanbetov osy jyldyń 1 shildesinde bastalǵan qanatqaqty jobanyń barysy týraly aıtyp berdi. Qanatqaqty joba salaly kásiporyndardyń bıznes-prosesterin zerdeleý úshin júrgiziledi. Osylaısha, qatysýshylar tikeleı ózderiniń óndiristik jelilerinde óndiriletin ónimdi tańbalaý prosesteriniń erekshelikterimen tanysady.
– Salanyń jobaǵa belsendi qatysýy elimizdegi sý men sýsyndardy tańbalaý jobasyna qoıylatyn talaptardyń qanshalyqty muqııat eskeriletinine baılanysty. Sıfrly tańbalaýdy engize otyryp, óndirýshiler naryqtyń barlyq ózgeristerine jedel monıtorıng júrgizip, óz brendin qorǵaı alady. Al tutynýshylar satyp alynatyn taýarlarǵa qoǵamdyq baqylaý júrgizý múmkindigine ıe, – dep túsindirdi biryńǵaı operator jobasynyń jetekshisi E.Nurmaǵanbetov.
Eske sala keteıik, Reseı qazirdiń ózinde sýdy sıfrly tańbalaýǵa kóshti. Bul elde sarapshylar osy naryqtaǵy sapasyz jáne jalǵan ónimderdiń úlesin 67 paıyz dep baǵalap otyr. Qazaqstandaǵy atalǵan kórsetkish birneshe ese az. Iаǵnı 20 paıyzǵa teń. Biraq qoǵam ókilderi kóleńkeli aınalym deńgeıiniń tómendigine qaramastan, sýdy jáne sýsyndardy jappaı suranysqa ıe ónim dep sanaıdy. Sondyqtan tutynýshylarǵa ónimdi zańdy túrde tekserýge múmkindik berý mańyzdy.
Alkogolsiz sýsyndar men shyryn óndirýshiler qaýymdastyǵynyń atqarýshy dırektory Álııa Mamytbaevanyń aıtýynsha, elimizdegi kontrafakt jáne zańsyz aınalym statıstıkalyq qatelik deńgeıinde.
– Árbir ónimniń qaptamasyna kez kelgen nárseni jazýǵa bolady. Jalǵan derekter jazý problema emes. Al qaptamada taýardyń jaramdylyq merzimi, quramy, óndirýshisi týraly barlyq málimet jınaqtalǵan sıfrly kod bolǵan jaǵdaıda, sapa men zańdylyqqa senimdi bola alamyz. Bizdi tutynýshy retinde mundaı quqyqtan aıyrýǵa bolmaıdy. Kontrafaktiniń elden elge taralyp ketýine de jol joq, – deıdi Densaýlyq saqtaý mınıstrligi janyndaǵy Qoǵamdyq keńestiń múshesi Jámıla Sadyqova. Qanatqaqty jobanyń qatysýshysy Tassay saýda belgisimen ónim shyǵaratyn «Iýnıks» JShS óz óndirisinde sıfrly tańbalaýdy engizýdi bastady.
– Biz ózimiz úshin jobany engizýdiń tıimdi tehnıkalyq sheshimin anyqtadyq. Tańbalaý kodtaryn qoldanýdyń qoljetimdi tıpografııa- lyq ádisin zerttedik. Jalpy, bul prosesten syrt qala almaımyz. О́ıtkeni ónimdi tańbalaý engizilip jatqan Reseıge sý eksporttaımyz. Demek, biz kórshi eldiń jańa naryqtyq erejelerine beıimdelýimiz kerek. Árıne, jabdyqty satyp alý boıynsha máseleler bar. Biraq munyń bári retteledi dep oılaımyn, – deıdi Tassay kompanııasynyń tańbalaýdy engizý jónindegi joba jetekshisi Ibragım Abdýllın.
Biryńǵaı operator jobany iske asyrý boıynsha jumys toby qurylǵanyn habarlady.