Aýyl sharýashylyǵy mınıstrligine qarasty Mal sharýashylyǵy departamentiniń dırektory Maqsut Baqtybaevtyń ústinen taǵy bir qylmystyq is qozǵaldy. Bul týraly «Qazaqstan» telearnasy habarlady.
Ol ótken jyldyń jeltoqsan aıynda mekeme baqylaýyndaǵy jaýapkershiligi shekteýli seriktestiktiń basshysynan 720 myń teńge para alý ústinde ustalǵan bolatyn.Sol kezde kásipkerge memlekettik satyp alý kelisim-shartyna qol qoıǵyzýǵa kómektesem dep ýáde bergen eken. Al osy jyly onyń taǵy bir bylyǵy áshkere boldy.
«Oǵan qyzmet babyn paıdalanyp, baǵynyshty mekeme, ıaǵnı «Mal sharýashylyǵy jáne veterınarııanyń ǵylymı-ınnovasııalyq ortalyǵy» JShS-ne paıda alyp berý maqsatynda basqa kásiporynnyń zańdy kásipkerlik qyzmetine kedergi keltirý arqyly memleketke 19,5 mln. teńgege zalal keltirdi degen aıyp taǵyldy», - dedi Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı.
Soltústik Qazaqstan oblysynda týǵan M. Baqtybaev Voxpopuli.kz saıtyna bergen suhbatynda bylaı degen bolatyn: «Barlyǵyna tek tamyr-baılanys arqyly ǵana qol jetkizýge bolady degen qatyp qalǵan pikir bar. Biraq, bulaı deıtin adamdardyń kóbi tipti osynyń ras-ótirigin tekserý úshin saýsaǵyn da qımyldatpaıdy, olar qol qýsyryp otyrǵandy jaqsy kóredi. Men mundaı pikirlerden aýlaq boldym. Bul - meniń artyqshylyǵym. Men barlyǵyna tek ózim qol jetkizdim jáne jetkizip júrmin - stýdenttik jataqhanadan bastap elıtalyq baspanaǵa deıin. Jas kezimnen bastap qoǵamdyq ómirge belsene aralastym. Astanadaǵy MGÝ-diń bólimshesine «grantqa» oqýǵa tústim. Úshinshi kýrstan bastap oqýymdy Máskeýde jalǵastyrdym. Oqýymdy bitirgen soń, «Bolashaq» baǵdarlamasy boıynsha bilim alýǵa bel býdym. Sóıtip, Londonǵa oqýǵa attandym. Endi men mal sharýashylyǵy salasyn jete túsinemin.Biz elıtalyq tuqymdy sıyrlardy ósirip jatyrmyz».
Ámirhan Almaǵanbetov.
Derekkóz: «Qazaqstan» telearnasy.
Foto: Kz.Troniks.kz.