Elordada Halyqaralyq Túrki akademııasynyń jańa ǵımaraty ashyldy. Saltanatty sharaǵa QR Memlekettik hatshysy Qyrymbek Kósherbaev pen zııaly qaýym ókilderi qatysty, dep habarlaıdy Egemen.kz.
«Elbasy Nursultan Nazarbaevtyń bastamasymen qurylǵan Túrki akademııasy túrkitildes baýyrlas elderdi rýhanı turǵydan baılanystyratyn yqpaldy halyqaralyq uıymǵa aınalyp keledi. Memleket Basshysy Qasym-Jomart Toqaevtyń qoldaýymen búgin akademııanyń jańa ǵımaratynyń ashylýyna kýá boldyq. Barshańyzdy osy mańyzdy kúnmen shyn júrekten quttyqtaımyn. Halyqaralyq Túrki akademııasy baýyrlas halyqtardyń mádenıetin, ádebıetin, tilin zamanaýı jańǵyrtýǵa erekshe úles qosýda», dep atap ótti Qyrymbek Kósherbaev.
Akademııa ǵımaratynda murajaı men kitaphana ornalasqan, onda túrki álemine qatysty qundy eksponattar men ádebıetter usynylǵan.
«2009 jyly Elbasynyń bastamasymen Halyqaralyq Túrki akademııasy ashyldy, 2010 jyly akademııaǵa Beıbitshilik jáne kelisim saraıynda jeke keńse berildi. Al búgin Memleket basshysynyń tapsyrmasy boıynsha bizdiń akademııanyń jańa ǵımaraty ashyldy. Jańa ǵımarat eki bólikten turady. Birinshisinde murajaı men kitaphana ornalasqan. Al ekinshisi - bizdiń qyzmetkerlerimizdiń jumys kabınetteri. Murajaıdyń ózi úsh bólikke bólingen. Birinshi bóligi túrki halyqtarynyń etnografııasyna, ekinshi bóligi jalpy túrkologııaǵa arnalǵan, al úshinshi bóligine akademııaǵa syıǵa tartylǵan kádesyılar men eksponattar ornalastyrylady», dedi Halyqaralyq Túrki akademııasynyń prezıdenti Darhan Qydyráli.