Semeı ejelden elimizdiń rýhanı ortalyqtarynyń biri ǵana emes, biregeıi sanalady. О́ıtkeni, munda Abaı, Shákárim, Muhtar syndy ulylardyń, Alash qaıratkerleriniń tabanynyń izi qalǵan. Onyń syrtynda elimizdegi alǵashqy ólketaný murajaıy men kitaphana ashylyp, alǵashqy fýtbol komandasy da osynda qurylǵan.
Qazir de sol ıgi dástúr óz jalǵasyn tabýda. Sonyń aıǵaǵyndaı, munda aıtysker aqyndar mektebiniń jumys isteı bastaǵanyna birneshe jyldyń júzi boldy. Belgili aıtysker aqyn Dámesh Omarbaeva jetekshilik etetin osy mektep túlekteriniń esimi búginde respýblıka kóleminde keńinen tanylyp otyr. Sońǵy birer jylda Shákárim atyndaǵy Semeı memlekettik ýnıversıteti janynan ashylǵan Abaı atyndaǵy zııalylar klýbynda da ıgi sharalar kóptep atqarylýda.
Jýyrda, Semeıdegi Abaıdyń respýblıkalyq qoryq murajaıynda «Asyl qazyna» degen atpen jas aqyndar klýby ashyldy. Atalǵan klýbtyń ashylý saltanatynda murajaı dırektory Jandos Áýbákir atap aıtqandaı, klýbtyń maqsaty – bulaqtyń kózin ashýmen birge, jas óskinderdiń jyrlaryn talqylap, baǵyt berý, toptama jyr jınaqtaryn shyǵarýǵa qamqorlyq tanytý bolyp tabylady. Rásimde jergilikti etnograf qalamger Moldabek Janbolatuly jetkinshekterge ataly da bataly sóz aıtsa, joǵaryda esimi atalǵan aıtysker aqyn Dámesh Omarbaeva jańadan ashylǵan jas aqyndar klýbyna ıgi tilektestigin bildirdi. Munan keıin jastar men jetinshek aqyndar tebireniske toly jyr shýmaqtaryn oqydy. Kesh sońynda jetkinshek aqyndarǵa klýbtyń múshelik bıleti saltanatty jaǵdaıda tabys etildi.
Dáýlet SEISENULY.
SEMEI.