Mańǵystaý aýdanynyń ortalyǵy Shetpe aýylynda túrik tehnologııasymen qyzanaq ósirýge arnalǵan jylyjaı iske qosyldy.
Aýdany 1 gektardy quraıtyn jylyjaı jylyna 150-160 tonna kókónis beredi dep josparlanýda. Investısııalyq jobanyń quny – 400 mln teńge. Jylyjaıdy «ElektroSerıs» JShS salyp, qajetti qondyrǵylardy «Serasan» fırmasy ornatty. Joba aıasynda jańa jumys oryndary ashylyp, aýdannyń 20 turǵyny turaqty jumysqa ornalasty.
– 22 qyrkúıekte Prezıdent Qasym-Jomart Toqaev Mańǵystaý oblysyna kelgen saparynda azyq-túlik baǵasynyń qymbattaýyn toqtatý úshin aýyl sharýashylyǵy ónimderine qoljetimdilikti qamtamasyz etýdi tapsyrǵan bolatyn. Memleket basshysynyń tapsyrmasyna sáıkes oblys ákimi bizge birqatar mindet júktedi. Aldaǵy ýaqytta jylyjaıdaǵy ónim kólemin ulǵaıtý josparlanyp otyr. Osylaısha, mamandar jyldyń tórt mezgilinde oblys turǵyndaryn tolyqtaı qyzanaqpen qamtymaq, – dedi aýdan ákimi Tilek Kóshmaǵambetov.
Qyzanaq óndirýge arnalǵan jylyjaı el Táýelsizdiginiń 30 jyldyǵyna oraı aýdan turǵyndaryna berilgen erekshe tartý bolyp otyr.