Ál-Farabı atyndaǵy Qazaq ulttyq ýnıversıtetinde Memleket basshysy Qasym-Jomart Toqaev ǵylymı qaýymdastyq ókilderimen kezdesip, elimizdiń joǵary bilim júıesin damytý men ǵylymnyń jańa baǵytyn aıqyndaýǵa qatysty mańyzdy máselelerdi kóterdi, dep jazady Egemen.kz
Prezıdent sońǵy jyldary Qazaqstanda álemniń jetekshi joǵary oqý oryndarynyń fılıaldaryn ashý baǵytynda júıeli jumys júrgizilgenin atap ótti. Bul bastama jastardyń el ishinde sapaly bilim alýyna jol ashyp, halyqaralyq standarttardy engizýge múmkindik bergen. Qazirgi tańda elimizde 33 sheteldik ýnıversıtet fılıaly jumys isteıdi. Olardyń qatarynda Máskeý ınjenerlik fızıka ınstıtýty, Arızona ýnıversıteti, Sorbonna, Lotarıngııa ýnıversıteti, Kardıff ýnıversıteti, De Montfort ýnıversıteti, Beıjiń til jáne mádenıet ýnıversıteti sııaqty bedeldi oqý oryndary bar.
Prezıdent: Sıfrlandyrý men jasandy ıntellektiniń damýyna basa mán berýimiz kerek
Alaıda Memleket basshysy bul jumystyń tek sanmen shektelmeýi kerektigin eskertti.
«Bizge esep úshin ashylǵan, ulttyq ǵylymdy damytýǵa qaýqarsyz fılıaldardyń qajeti joq. Basty nazar sanda emes, sapada bolýǵa tıis. Qazaqstanda jumys isteıtin ár fılıal joǵary bilim salasyndaǵy básekeni arttyrýǵa yqpal etýi kerek», dedi Prezıdent.
Sondaı-aq Qasym-Jomart Toqaev memlekettik granttardy bólý máselesine toqtalyp, sheteldik fılıaldar men otandyq ýnıversıtetter arasyndaǵy qarjylandyrý aıyrmashylyǵyn qaıta qaraý qajettigin aıtty. Úkimet deregine sáıkes, bir stýdentke sheteldik fılıaldarda bólinetin grant kólemi ulttyq ýnıversıtetterge qaraǵanda bes ese kóp. Prezıdent mundaı jaǵdaıda ádil básekelestik qalyptastyrý qıyn ekenin atap ótip, tıisti taldaý júrgizýdi tapsyrdy.
Kezdesýde Memleket basshysy tehnıkalyq jáne ınjenerlik mamandar daıarlaý máselesine erekshe mán berdi. Onyń aıtýynsha, elde gýmanıtarlyq baǵyttaǵy mamandar sany shamadan tys kóbeıgen.
«Ulttyń mentalıtetin ózgertýimiz kerek. Ol úshin ǵylym men tehnologııaǵa moıyn burý qajet. Qazaqstanda sana revolıýsııasyn jasaýymyz kerek dep oılaımyn», dedi Prezıdent.
Osy turǵyda ýnıversıtetterdiń róli aıryqsha ekeni atap ótildi. Joǵary oqý oryndary el bolashaǵy úshin jaýapkershilik alatyn, bilimdi ári parasatty jańa býyndy qalyptastyrýy tıis. Prezıdent bilimdi tek áleýmettik qyzmet emes, mańyzdy óndiristik kúsh retinde qarastyrý qajettigin jetkizdi.
Toqaev: Ǵylymı ázirlemelerden aýyz toltyryp aıtarlyq ekonomıkalyq áser ázirge joq
Memleket basshysy bıylǵy jyldy «Sıfrlandyrý jáne jasandy ıntellekt jyly» dep jarııalaǵanyn eske salyp, ǵylym men tehnologııany damytý baǵytynda naqty qadamdar jasalatynyn aıtty. Sonyń biri – Jasandy ıntellekt ýnıversıtetin ashý. Bul oqý orny alǵashqy stýdentteri men magıstranttaryn bıyl qabyldaýdy josparlap otyr.
«Irgeli ǵylymsyz jasandy ıntellektini damytý múmkin emes. Algorıtmder men kúrdeli ınjenerlik ónimder, eń aldymen, damyǵan ǵylymı jáne ýnıversıtettik ortada paıda bolady. Sol sebepti osy baǵytqa aıryqsha kóńil bólemiz», dedi Qasym-Jomart Toqaev.
Eske sala keteıik, búgin Prezıdent Qasym-Jomart Toqaev Almaty qalasyna jumys sapary aıasynda ál-Farabı atyndaǵy Qazaq ulttyq ýnıversıtetiniń ǵylymı áleýetimen tanysty.