Prezıdent: Sıfrlandyrý men jasandy ıntellektiniń damýyna basa mán berýimiz kerek

«Biz elimiz ósip-órkendesin desek, eń aldymen, sıfrlandyrý men jasandy ıntellektiniń damýyna basa mán berýimiz kerek. Bul – meniń Prezıdent retindegi eń mańyzdy maqsatymnyń biri. Jalpy, sońǵy ýaqytta bul salada aýqymdy sharýa atqaryldy, áli de kóp jumys isteýimiz kerek. Keıingi bes jylda ǵylym salasyna salynǵan ınvestısııa kólemi alty eseden asty. Elimizde zertteý ýnıversıtetteri kóbeıýde, olardyń naqty óndirispen baılanysy nyǵaıyp jatyr. Úkimettiń málimeti boıynsha, qazir 200-den asa kommersııalyq joba qolǵa alyndy. Osylaısha, «Ýnıversıtet – zertteý – ınnovasııa – kommersııa» ekojúıesi birtindep paıda bolyp jatyr. Ǵylym qalashyqtary salynyp, tehnologııa parkteri jáne ınjınırıng ortalyqtarynyń qurylysy bastaldy. Bir sózben aıtqanda, ǵylym salasynda kóp jyl boıy bolmaǵan oń úrdister baıqalyp jatyr. Bul óte mańyzdy jumysqa sizder de belsene atsalysyp júrsizder. Barshańyzǵa shynaıy rızashylyǵymdy bildiremin», dedi Memleket basshysy.

Memleket basshysy endi elimizdiń jańa Konstıtýsııasyna saı ǵylym salasy budan da joǵary qarqynmen damıtynyna nazar aýdardy.

Qasym-Jomart Toqaevtyń aıtýynsha, Ata zańymyzda ǵylymnyń órisin keńeıtý negizgi strategııalyq basymdyqtyń biri retinde kórsetilip otyr.

Bul ýnıversıtetterdi, zertteý ınfraqurylymyn damytý, ǵalymdardyń jaǵdaıyn jasaý – Úkimet jumysynyń bir baǵyty ǵana emes, memlekettiń konstıtýsııalyq mindeti retinde bekitildi degen sóz.

«Qazaqstanda 420-dan astam ǵylymı-zertteý uıymy bar. Onda 27 myńnan asa ǵalym men ǵylymı qyzmetker eńbek etip júr. Bul – óte úlken akademııalyq korpýs. Ásirese, ǵylymı ortanyń jasaryp kele jatqany qýantady. Otandyq ǵalymdardyń jartysyna jýyǵy 40 jasqa tolmaǵan. Urpaqtar sabaqtastyǵy kóz ilespes jyldamdyqpen damyp jatqan álemde ǵylymnyń zaman talabyna saı bolýyna múmkindik beredi. Men qazaq ǵylymynyń keleshegine úmitpen qaraımyn. Áıtse de halyqaralyq tájirıbemen jete tanys adam retinde otandyq ǵylymnyń qazirgi jaı-kúıin asyra baǵalaýdan, «tolaıym tabysqa jetti» dep aıtýdan aýlaqpyn. Degenmen ǵylymdy damytý úshin bizde ınfraqurylym da, adamı áleýet te bar. Úkimet pen ǵylymı qoǵamdastyqtyń aldynda ortaq strategııalyq maqsat tur. Ol – anaǵurlym tıimdi ǵylymı orta qalyptastyrý, ekonomıkadaǵy ınnovasııany yntalandyrý, ǵylymdy óndirispen barynsha ushtastyrý. Ashyǵyn aıtqanda, sheshimin kútken másele shash etekten», dedi Memleket basshysy. Eske sala keteıik, búgin Prezıdent Qasym-Jomart Toqaev Almaty qalasyna jumys sapary aıasynda ál-Farabı atyndaǵy Qazaq ulttyq ýnıversıtetiniń ǵylymı áleýetimen tanysty.