Fransýzdyq rejısser Romen Gavras «ǵasyr urlyǵy» dep atalǵan Lývrdaǵy atyshýly urlyq týraly fılm túsiredi, dep habarlaıdy Egemen.kz.
Rejısser qazirdiń ózinde ssenarıster Sımon Jake men Mýrad Vıntermen birge jumys isteı bastaǵan. Qazir fılmniń resmı ataýy da, prokatqa shyǵý kúni de jarııalanǵan joq. Alaıda ınsaıderler premera 2028 jyly ótýi múmkin dep boljaıdy.
Romen Gavras «Afına» jáne «Álem seniki» («Mır prınadlejıt tebe») fılmderimen, sondaı-aq Kane Ýest, M.I.A. jáne Jay-Z úshin túsirgen klıpterimen tanymal.
Eske salsaq, 2025 jyldyń qazanynda qaraqshylar Lývr mýzeıiniń joǵarǵy qabatyndaǵy fransýz koroldik áshekeıleri saqtalǵan Apollon galereıasyn tonaǵan.
Qaskóıler júk kóligine ornatylǵan baspaldaq arqyly terezeden kirip, joǵary deńgeıde qorǵalǵan eki vıtrınany buzyp ashqan. Olar toǵyz eksponatty, sonyń ishinde patshaıymdar Marııa-Amelııa men Gortenzııaǵa tıesili gaýhar men sapfırden jasalǵan áshekeıler jıyntyǵyn urlap ketken.
Urlanǵan zergerlik buıymdardyń quny bastapqyda shamamen 88 mıllıon eýroǵa baǵalanǵan.
Keıinnen jergilikti BAQ Lývrdaǵy urlyqtyń qaýipsizdikke qatysty bolǵanyn jazdy. Beınebaqylaý serverleriniń qupııasózi «Louvre» sózi bolǵan, al qaýipsizdik júıesi áli 2003 jylǵy baǵdarlamalyq jasaqtamamen jumys istegen. Osydan soń Qazaqstandaǵy barlyq mýzeılerde qaýipsizdik talaptaryna qatysty tekserý júrgizilgen bolatyn.