Almatylyq Mansýr-Soıor Dosanov University of California, Berkeley ýnıversıtetine matematıka jáne fızıka baǵyty boıynsha oqýǵa qabyldandy, dep jazady Egemen.kz.
AQSh ýnıversıtetterine túsýge daıyndyqty Mansýr 2023 jyly bastady. Oqýǵa túsý úshin qajet SAT halyqaralyq emtıhanynyń qorytyndysy boıynsha ol 1600 múmkin baldyń 1530-yn jınady. Sonymen qatar Mansýr aǵylshyn tili boıynsha halyqaralyq IELTS emtıhanynan 8.5 ball aldy. Bul nátıjeler − kópjyldyq eńbektiń, úzdiksiz oqý men tártiptiń, sondaı-aq ózin-ózi damytýǵa baǵyttalǵan turaqty jumystyń jemisi.
Mansýr ómiriniń alǵashqy kúnderinen bastap serebraldy sal aýrýy dıagnozymen ómir súrip keledi. Qıyndyqtarǵa qaramastan, ol bilim alyp, damyp, óz maqsattaryna senimdi túrde umtyldy. Mansýrdyń oqıǵasy ınklıýzıvti bilim berýdi damytýdyń jáne ár balanyń óz áleýetin ashýyna múmkindik beretin jaǵdaı jasaýdyń qanshalyqty mańyzdy ekenin kórsetedi.
Elordalyq oqýshy Garvard ýnıversıtetine oqýǵa tústi
Onyń jetistikterinde otbasynyń qoldaýy erekshe ról atqardy. Mansýrdyń ata-anasy ulyn ár kezeńde qoldap, onyń damýyna barlyq jaǵdaıdy jasap keledi.
Mansýr júzýmen aınalysady, aspazdyqqa qyzyǵady jáne saksofonda oınaıdy. Mýzykalyq aspapty meńgerý men oqýǵa túsýge daıyndalý odan úlken erik-jigerdi talap etti.
Búginde onyń jetistigi otbasynyń qoldaýy, júıeli eńbek pen bilimge umtylys úlken maqsattarǵa jetýge múmkindik beretininiń jarqyn úlgisi bolyp otyr.
Garvardty baǵyndyrǵan qarakóz nemese Qazaqstan biliminiń jańa kezeńi
University of California, Berkeley − álemdegi jetekshi zertteý ýnıversıtetteriniń biri. Bul oqý ornymen ondaǵan Nobel syılyǵynyń laýreattary baılanysty, al onyń ǵylymı mektebi matematıka, fızıka, ınjenerııa jáne kompıýterlik ǵylymdar salalaryndaǵy eń myqty mektepterdiń biri sanalady. Berkeley ýnıversıtetine túsý AQSh ýnıversıtetteri arasyndaǵy eń joǵary básekeli qabyldaýlardyń biri bolyp esepteledi.
Aıta keteıik, elordalyq oqýshy Garvard ýnıversıtetine oqýǵa tústi.