Shymkentte JI mektebi iske qosyldy. Jobaǵa 18 jastan asqan kez kelgen azamat tegin qatysa alady. IT salasynda tájirıbesi joq adamdarǵa da múmkindik berilgen. Qazir alǵashqy qatysýshylar baǵdarlamalaý men sıfrlyq jobalar jasaýdy meńgerip jatyr, dep habarlaıdy Egemen.kz
24.kz-tiń málimetinshe, Shymkent qalasynda ashylǵan mektep dástúrli oqytý júıesinen ózgeshe formatta jumys isteıdi. Munda dáris pen konspektiniń ornyna komandalyq jumys pen naqty jobalarǵa basymdyq beriledi. Oqýshylar teorııany jattap qana qoımaı, birden sıfrlyq ónim ázirleýge mashyqtanady.
Mekteptiń óńirlik dırektory Ýálıhan Slambekov bul júıeniń halyqaralyq deńgeıde tıimdiligin dáleldegenin aıtty.
«01EDU júıesi ózin álemde dáleldedi. Ol Qazaqstanda ǵana emes, Fransııa, Kenııa sekildi elderde de qoldanylady. Bul – dástúrli format emes. Munda muǵalim, leksııa, konspekt bolmaıdy. Oqý tolyqtaı tegin», dedi ol.
Mektepke qabyldaný úshin úmitkerler arnaıy kompıýterlik oıynnan ótedi. Osy arqyly olardyń este saqtaý qabileti, logıkasy jáne synı oılaý deńgeıi tekseriledi. Irikteýden ótkender kásibı ázirleýshilermen birge jobalar jasap, eki jyl ishinde keminde 50 joba ázirleýi tıis.
JI dáýirindegi mektep: Oqýshylarǵa paıdasy men qaýpi qandaı?
Sonymen qatar qalada jasandy ıntellekt zerthanalary, robototehnıka baǵyttary men IT-startaptar da qarqyndy damyp keledi.
Tashenev University prorektory Janar Rysbekova jasandy ıntellektini zaman talaby dep baǵalady.
«Bul – búgingi kúnniń shyndyǵy. Qazirdiń ózinde jastar jańa júıeler men baǵdarlamalar oılap taýyp jatyr. Biz budan qashyp qutyla almaımyz. Kerisinshe, jasandy ıntellektini kómekshi qural retinde qabyldaýymyz kerek», dedi ol.
Oqýshylar dron qurastyryp, olardy basqarýdy jáne robottardy baǵdarlamalaýdy úırenedi. Tipti keı zerthanalarda ushqyshsyz apparattar mını-fýtbol oınaıdy.
Shymkent Hub alańynda da jasandy ıntellekt negizindegi jobalar júzege asyrylyp jatyr. Qazir onda ondaǵan IT-startap jumys isteıdi. Olardyń keıbiri qaladaǵy ınfraqurylym máselelerin sheshýge baǵyttalǵan.
Shymkent Hub óńirlik menedjeri Qurmanǵazy Muratov aıtýynsha, qazir qubyrlardy skanerleıtin joba bar. Ol qubyrdyń qaı bóligi eskirgenin anyqtap, qaı jerin aýystyrý qajet ekenin kórsetedi. Buǵan deıin qubyr tolyq kesilip, túgel jańartylatyn.
Qazaqstanda bıyl ashylatyn JI ýnıversıtetine kimder túse alady?
Al Hımııa-tehnologııalyq ǵylymdar ǵylymı-zertteý ınstıtýty dırektory Jambyl Aımenov Shymkentte iri jasandy ıntellekt jáne robototehnıka ortalyǵy ashylatynyn málimdedi.
«Tehnogendik qaldyqtar negizinde qurylys materıaldaryn óndirýdiń barlyq tehnologııalyq prosesi robottar men robototehnıka kómegimen, adam qatysýyn barynsha azaıta otyryp júzege asyrylady. Bul baǵytta biz qalamyzdaǵy birqatar ozyq kásiporyndarmen jumys istep jatyrmyz. Jobaǵa Qytaı, Vengrııa jáne birneshe Eýropa elderiniń kásiporyndary qatysady», dedi Jambyl Aımenov.
Búginde jasandy ıntellekt bilim berý, qala qyzmetteri men óndiris salasyna belsendi engizilip jatyr. Shymkentte bul baǵyttaǵy mektepter men zerthanalar kóbeıip, jańa tehnologııalyq startaptar iske qosylyp otyr.
Osydan birer jyl buryn Qazaqstanda alǵashqy jasandy ıntellekt mektebi ashylatyny týraly habarlaǵanbyz.