Aqtaý qalasyndaǵy Nazarbaev Zııatkerlik mektebiniń 11-synyp oqýshylary Asııa Tedjen men Ernar О́mirzaq bıologııa páni muǵalimi Gúlnur Chandybaevanyń jetekshiligimen aramshópten bıoplastık alý jolyn usyndy. Olar alǵashqy ónim retinde bıopaket daıyndap ta kórgen.
– Bizdiń jobamyzdyń ereksheligi – ekologııalyq turǵydan taza ónim ekeninde. Kúndelikti turmysta qoldanyp júrgen polıetılen paketterdiń joıylýyna 100 jyldan asa ýaqyt kerek. Al bizdiń ónimimiz úsh jyldyń ishinde qarashirikke aınalyp ketedi. Al eger qyshqyldyq ortaǵa túser bolsa on mınýtta joıylady, – deıdi birneshe synaq jumystaryn júrgizgen Ernar men Asııa.
Zııatkerlerdiń aıtýynsha, alǵashynda mektep aınalasyndaǵy aramshópterdi kádege jaratý qajettiligi baıqalǵan. Keıin ustazdarymen oılana kele bıoplastık jasap kórýge bel baılaǵan.
– Biz aramshópti ıkemdi etý úshin birneshe qoljetimdi qospalardy qostyq. Kúndelikti turmysta qoldanyp júrgen krahmal, boıaǵysh, jaǵymsyz ıisti joıý úshin hosh ıis qospalaryn da qostyq, – deıdi Ernar О́mirzaq.
Sondaı-aq oqýshylar bıopakettiń tyǵyzdyǵyn ártúrli deńgeıde jasaýǵa bolatynyn aıtty.
– Qazirgi paketimiz 500 gramǵa deıin kótere alady jáne birneshe túste bar. Bizdiń esepteýimiz boıynsha tehnologııany avtomattandyrǵan jaǵdaıda bir ónimniń quny 30 teńgege shyǵady. Aldaǵy ýaqytta jobamyzdyń avtorlyq quqyǵyn qorǵap, naryqqa shyǵarǵymyz keledi, – deıdi Asııa Tedjen.
Zertteýshiler qazirgi tańda prosesti avtomattandyrý stanogynyń mehanızmin daıyndaý ústinde. Sonymen qatar stanokty jasaýǵa tehnıkalyq kómek kórsetýge daıyn komanda izdep jatyr.
Nazarbaev Zııatkerlik mektepteri jelisinde qarashanyń 1-i men 5-i aralyǵynda ǵylymı jobalar baıqaýy ótip jatyr. Aqtaýdaǵy Nazarbaev Zııatkerlik mektebinen 12 joba qatysýda. Ernar men Asııanyń bul jobasy da respýblıkalyq baıqaýda synǵa túsedi.
Mańǵystaý oblysy