Ǵylym jetistikteri –Ekonomıkada

Keshe Parlament Senatynyń Áleýmettik-mádenı damý jáne ǵylym komıteti Qazaqstan ulttyq jaratylystaný ǵylymdary akademııasymen birlesip, «Qazaqstan-2050» Strategııasyn iske asyrý aıasynda «Ǵylymı zertteýlerdiń tıimdiligin quqyqtyq qamtamasyz etýdi jetildirý sharalary jáne olardyń nátıjelerin elimizdiń áleýmettik-ekonomıkalyq jańǵyrtý úderisterine engizý» taqyrybynda dóńgelek ústel ótkizdi. Sharaǵa Parlament depýtattary, salalyq mınıstrlikter men mekemeler, ǵylymı orta jáne oqý oryndarynyń ókilderi qatysty. Dóńgelek ústel otyrysynyń aldynda qatysýshylar ǵylymı-tehnıkalyq kórmeni tamashalady. Onda qatysýshylarǵa elimiz ǵylymynyń jetistikteri, ǵalym­darymyzdyń jańa tehnologııalyq jobalary men tehnologııalyq sheshimderi, sondaı-aq, óndiristik ortalarǵa ınnovasııa engizýdiń is júzindegi nátıjeleri kórsetildi. Dóńgelek ústeldi Áleýmettik-mádenı damý jáne ǵylym komı­tetiniń tóraǵasy Aqan Bıjanov ashyp, júrgizip otyrdy. Otyrysta Qazaqstan ulttyq jaratylystaný ǵylymdary akademııasynyń pre­zıdenti Nurtaı Ábiqaev qaty­sý­shylarǵa arnap sóz sóıledi. Ol Memleket basshysynyń «Qa­zaq­stan-2050» Strategııasy aıasynda alǵa qoıylǵan mindetterdiń Qa­zaqstan ǵylymyn damytýdaǵy mańyzyn aıta kelip, venchýrlyq qarjylandyrý, zııatkerlik menshikti qorǵaý, zertteýler men ınnovasııany qoldaý tetikterin jetildirýdiń zańnamalyq aspektileri jáne ǵy­lymı jańalyqtardy kommer­sııa­landyrý Prezıdent N.Á.Nazar­baevtyń Joldaýyn iske asyrýdyń Jalpyulttyq josparyna engi­zilgenin atap ótti. О́ziniń sózinde jınalys tóra­ǵasy A.Bıjanov elimizdiń ǵylymı áleýetin nyǵaıtý, ǵylymǵa ne­gizdelgen ekonomıkaǵa kóshý ornyq­ty ekonomıkalyq damýǵa jáne Qa­zaqstannyń álemdik naryqtaǵy básekege qabilettiligin qamtamasyz etýge, sondaı-aq áleýmettik-ekono­mıkalyq jańǵyrtýdyń aýqym­dy máselelerin sheshýge yqpal etetinin atap ótti. Osyǵan baılanysty senator Memleket basshy­synyń Joldaýynda ǵylymdy damytýǵa, onyń ishinde salany qarjylandyrýdy IJО́-niń qazirgi 0,28 paıyzynan 3 paıyzǵa deıin kóterý arqyly erekshe kóńil bólinip otyrǵanyn jetkizdi. Dóńgelek ústelde negizgi baıan­damany Bilim jáne ǵylym mınıstri Aslan Sárinjipov jasady. Ol Prezıdent Joldaýyndaǵy min­det­terden týyndaıtyn mınıstrliktiń jumys jospary týraly aıtty. Mınıstrlik jumysy ǵylym men ınnovasııalyq damýdy úılestirýge, mamandar áleýetiniń básekege qabilettiligin arttyrýǵa, ǵylym ınfraqurylymyn jań­ǵyrtýǵa jáne odan ári damy­týǵa baǵyttalatyny ataldy. A.Sárinjipovtiń aıtýynsha, bul jospar ǵylymnyń ekonomıka men ınnovasııaǵa is júzinde aralasýyn qamtamasyz etý maqsatynda ǵylymdaǵy reformalardy tereń­detýdi kózdeıdi. Ol úshin mı­nıstrlik «Ǵylym týraly» jáne ǵylym salasyndaǵy normatıvtik-quqyqtyq qosymsha aktilerge ózgerister men tolyqtyrýlar engizýdi usyndy. Olar ǵylymı qyzmet nátıjeleri aınalymyn yntalandyrýda quqyqtyq retteýdiń kemshilikterin keshendi túrde joıýǵa jáne ekonomıkanyń naqty sektoryna engizýge baǵyttalǵan, dedi mınıstr. Ǵylymdy odan ári damytýdyń keleshegi, onda óndiris pen bız­nes­tiń yqpaldasýy, ǵylymı qyz­met­tiń kommersııalanýy, ǵylymı zert­teýlerdiń tıimdiligin arttyrý máseleleri basqa da qaty­sýshylardyń sózderinde aıtyldy. Dóńgelek ústeldiń qory­tyn­dysy boıynsha usynystar ázirlenip, ol tıisti memlekettik organdardyń aldaǵy jumystary úshin jiberiletin boldy. Jaqsybaı SAMRAT, «Egemen Qazaqstan».