15 maýsym – Keńes Odaǵynyń Batyry, mergen Álııa Moldaǵulovanyń týǵan kúni. Uly Otan soǵysy jyldarynda Otan úshin otqa túsip, erligimen el esinde qalǵan qazaqtyń qaharman qyzynyń bıyl týǵanyna 101 jyl toldy, dep habarlaıdy Egemen.kz.
Byltyr Álııa Moldaǵulovanyń ǵasyrlyq mereıtoıy memlekettik deńgeıde keńinen atalyp ótti.
Atap aıtqanda, Álııa Moldaǵulovanyń 100 jyldyǵyna arnalǵan «Aıbyn» XI halyqaralyq áskerı-patrıottyq jastar jıynynyń ashylý saltanatynda Memleket basshysy Qasym-Jomart Toqaev Álııa Moldaǵulova men Mánshúk Mámetova syndy batyrlardyń erligi óskeleń urpaq úshin Otan aldyndaǵy paryzǵa adaldyqtyń úlgisin kórsetkenin atap ótken bolatyn.
Batyr qyzdyń qaısarlyǵy – Otanǵa adaldyqtyń, ór rýh pen janqııarlyqtyń jarqyn úlgisi.
Álııa Moldaǵulova 1925 jyly 15 maýsymda Aqtóbe oblysynyń Bulaq aýylynda dúnıege kelgen. Ǵumyry qysqa bolsa da, rýhy men esimi el jadynda máńgige saqtaldy.
Prezıdent Álııa Moldaǵulovanyń eskertkishine gúl shoǵyn qoıdy
Ashyq shaıqasqa 1943 jyldyń qazan aıynda 2-Prıbaltıka maıdanynyń 22-armııasy quramyndaǵy 54-jeke atqyshtar brıgadasy quramynda tústi.
1944 jylǵy 14 qańtarda Pskov oblysyndaǵy Nasva stansasyn jaý qolynan azat etý kezinde Álııa Moldaǵulova erekshe erlik kórsetti. Tolassyz oq astynda sarbazdardy birneshe márte shabýylǵa bastap, jaýyngerlerdi jigerlendirip otyrdy. Komandırler saptan shyqqan sátte basshylyqty óz qolyna alyp, urysty jalǵastyrdy. Aýyr jaralansa da, sońǵy demi qalǵansha maıdan shebin tastamaı, erjúrektik pen ójettiktiń ozyq úlgisin kórsetti.
Álııa Moldaǵulova nebári 18 jasynda maıdan dalasyna attanyp, erlikpen qaza tapty. Soǵystan keıin maıdanda qaza bolǵan jaýyngerlerdiń súıegi áskerı qurmetpen baýyrlastar zıratyna qaıta jerlendi.
Tarıhı derekterge sáıkes, mergen qyz maıdan dalasynda jaýdyń 78 soldaty men ofıseriniń kózin joıǵan. Kórsetken erligi men qaısarlyǵy úshin Álııa Moldaǵulovaǵa qaıtys bolǵannan keıin Keńes Odaǵynyń Batyry ataǵy berilip, «Altyn Juldyz» medalimen jáne Lenın ordenimen marapattaldy.
Álııa Moldaǵulovanyń esimi men erligi halyq jadynda máńgi saqtalyp keledi. Batyr qyzdyń aty kóptegen eldi mekenderge, kósheler men dańǵyldarǵa berilip, onyń qurmetine eskertkishter men memorıaldyq keshender salyndy.
Aqtóbe oblysynda Keńes Odaǵynyń Batyry Álııa Moldaǵulovaǵa arnalǵan oblystyq memorıaldyq mýzeı jumys isteıdi. Onda mergen qyzdyń balalyq shaǵy, oqyǵan kezeńi jáne maıdan jolyna qatysty qundy derekter jınaqtalǵan. Sonymen qatar Qobda aýdanyndaǵy Álııa aýylynda da onyń rýhyna arnalǵan mýzeı bar.
Qobda aýylynda Álııa Moldaǵulovanyń 100 jyldyǵy dúrkirep ótti
Álııa Moldaǵulovanyń esimi men erligi Máskeýde de keńinen nasıhattalyp keledi. 1998 jyly №891 mektepke Álııa Moldaǵulovanyń esimi berildi. Budan bólek, Álııanyń ózi tálim alǵan mergender mektebi ornalasqan dańǵyl onyń qurmetine atalǵan. Al 2005 jyly Álııa Moldaǵulovanyń 80 jyldyq mereıtoıy qarsańynda mektep aýlasyna eskertkish qoıyldy.
Qazaqtyń dańqty qyzy – el basyna kún týǵan shaqta halqyn, jerin jaýǵa bermeý úshin atqa qonǵan qazaqtyń batyr qyzdarynyń izbasary. Onyń taǵdyry men jaýyngerlik joly ádebıette, mýzykada, kıno men teatrda keńinen dáriptelip keledi. Al erligi men taǵylymy jyl ótken saıyn jańǵyryp, jańara bermek.
Eske sala keteıik, Álııa Moldaǵulovanyń 100 jyldyq mereıtoıy qarsańynda «Álııa Moldaǵulova. О́shpes erlik» atty ensıklopedııalyq jınaq jaryq kórdi.