El Táýelsizdiginiń 30 jyldyǵy men «Rýhanı jańǵyrý» baǵdarlamasy aıasynda Aqtóbede «Tuǵyrly Táýelsizdik» atty respýblıkalyq aqyndar aıtysy ótti. Jyr saıysyna Qazaqstannyń Eńbek Eri Asanáli Áshimov qazylyq etse, eki kúnge sozylǵan sheshendik ónerdiń báıgesin QR Eńbek sińirgen qaıratkeri Júrsin Erman júrgizdi.
Aıtysqa Nur-Sultan, Almaty, Shymkent qalalarynan, Aqmola, Almaty, Aqtóbe, Atyraý, Batys Qazaqstan, Jambyl, Qostanaı, Túrkistan, Pavlodar, Shyǵys Qazaqstan oblystarynan 20 aqyn qatysty.
Eki kúndik jyr saıysynyń qorytyndysy boıynsha bas júlde – 2 mıllıon teńge aqtóbelik tókpe aqyn Marat Ahmetovtiń qanjyǵasyna baılandy. Birinshi oryn Rústem Qaıyrtaıǵa (Almaty) buıyrdy. Munyń júlde qory 1,5 mıllıon teńge. Ekinshi orynnyń eki júldesi Arýna Kerimbek (Aqtóbe) pen Baýyrjan Shırmedınulyna (Batys Qazaqstan oblysy) tabystaldy. Munyń júlde qory – 1 mıllıon teńge. Al úshinshi oryndy Jambyl oblysynan kelgen aqyn Qanat Myrzahanuly, túrkistandyq Dáýren Aqsaqalov pen aqtóbelik Juldyz Qojabekova, pavlodarlyq Raýan Qaıdarov bólisti. Tórt tókpe aqynnyń árqaısysyna 500 myń teńgeniń sertıfıkaty tabystaldy. Sondaı-aq Nurlan Esenqul (Almaty) men Serik Qýanǵan (Shyǵys Qazaqstan oblysy) 450 myń teńgeniń arnaıy syılyǵymen marapattaldy.
Aqtóbe oblysy ákimdiginiń qoldaýymen oblystyq mádenıet, arhıvter jáne qujattama basqarmasy men oblystyq halyq shyǵarmashylyǵy ortalyǵy uıymdastyrǵan osy sharanyń qorytyndysynda júlde almaǵan on aqyn arnaıy dıplomdarmen marapattalyp, árqaısysy 300 myń teńgege ıe boldy. Táýelsizdik merekesi qurmetine jyr saıysyna kelgen barlyq aqyn osylaısha Aqtóbeden qur ketken joq. Aıtystan aıtysqa jetken saıyn aqynnyń shabyty shyńdala túseri anyq.
Aqtóbe oblysy