Almatyda Qazaq ulttyq qyzdar pedagogıkalyq ýnıversıtetinde «Alyp – anadan týady» atty taǵylymdy jıyn ótti. El egemendiginiń 30 jyldyǵyna oraı uıymdastyrylǵan sharaǵa QR Generaldar keńesiniń músheleri qatysyp, oqý ornynyń bilim alýshylarymen kezdesti, dep habarlaıdy Egemen.kz.
Basqosýdy Ýnıversıtettiń Basqarma tóraǵasy – Rektor Gúlmıra Qanaı ashyp, kezdesýdiń mańyzy men basty mindeti týraly aıtty.
– Qazaq eli Táýelsizdiginiń 30 jyldyǵyna oraı ýnıversıtetimizde kúndelikti sharalar ótýde. Al búgingi jıynnyń mańyzy erekshe ekendigin aıtqym keledi. Sebebi, aǵa býyn – bizdiń alǵa jol silteıtin shamshyraǵymyz syndy. «Qarııasy bardyń qazynasy bar». Búginde urpaq tárbıesinde aǵa býyn ókilderi uzaq jyldar boıy jınaǵan tájirıbesin paıdalanýdyń tıimdiligi óte zor. Sizder óz ǵumyrlaryńyzda ulttyq qaýipsizdigimiz ben el tynyshtyǵyn saqtaýda eleýli jumys istedińizder. Bul – Otan aldyndaǵy úlken azamattyq paryz, – dedi Gúlmıra Qanaı.
Kezdesýde Qazaqstan Respýblıkasy Ulttyq Qaýipsizdik komıtetiniń general-maıorlary Erkin Musabaev, Mahambet Mustafa, Marat Majıtov, Qazaqstan Respýblıkasy Ishki-ister mınıstrligi akademııasynyń polkovnıgi Amangeldi Alınov sóz sóılep, stýdentterge ónegeli áńgimelerin aıtty, áserli estelikterimen bólisti.
Basqosýdy ýnıversıtettiń Strategııalyq damý jáne áleýmettik jumys jónindegi prorektory Janar Rysbekova qorytyndylap, aǵa býyn ókilderine oqý orny qaýymdastyǵy atynan alǵys bildirdi.
ALMATY