Shyǵys Qazaqstan oblysynda «О́skemen-Semeı» tasjolynyń 10-198 shaqyrymy jabylyp, «Omby-Maıqapshaǵaı» tasjolynda kólik qozǵalysy shekteldi, dep habarlaıdy Egemen.kz.
ShQO tótenshe jaǵdaılar departamenti baspasóz qyzmetiniń málimetine súıensek, búgin saǵat 06.30-dan bastap óńir boıynsha aýa raıynyń nasharlaýyna, naqty aıtqanda jańbyr jaýyp, kóktaıǵaq bolýyna baılanysty jol jabyldy.
«Respýblıkalyq mańyzy bar «О́skemen-Semeı» tasjolynyń 10-198 shaqyrymynda (Gerasımovka aýyly men Semeı qalasynyń arasy) avtokóliktiń barlyq túrine júrýge tyıym salyndy.
Sondaı-aq respýblıkalyq mańyzdaǵy «Omby-Maıqapshaǵaı» tasjolynyń 756-906 shaqyrymynda (Semeı qalasy men Qalbataý aýylynyń arasy) tirkemesi bar júk kólikteriniń jáne avtobýstardyń qozǵalysy shekteldi», delingen aqparatta.
Osy rette departament mamandary turǵyndarǵa alys saparǵa shyqpaýǵa, joldardyń jaı-kúıin «Dármen» mobıldi qosymshasy arqyly tekserip otyrýǵa keńes beredi.