Elbasy Nursultan Nazarbaevtyń bıylǵy Qazaqstan halqyna Joldaýynda qoıylǵan mindetter san-salaly. Munda kez kelgen qazaqstandyq qoǵam músheleriniń muń-muqtajdary men talap-tilekteri, búgingi kúni olardy alańdatyp otyrǵan máseleler eskerýsiz qalmaǵan. Sonyń biri – múmkindigi shekteýli jandarǵa qoldaý kórsetýge baǵyttalǵan.
«Nur Otan» partııasy osyndaı izgi mindet pen paryzdy atqarý úshin «Kedergisiz keleshek» atty jobany júzege asyrýǵa kiristi. Osy joba sheńberinde atalǵan topqa kiretin el azamattarynyń ómir sapasyn jaqsartýǵa kóńil bólinbek. «Nur Otan» partııasy Batys Qazaqstan oblystyq fılıalynda qolǵa alynǵan is-sharalar kesheni olardyń úkili úmitteriniń aqtalýyna berik senim týǵyzady. Ásirese, Oral óńirinde múmkindikteri shekteýli jandar men múgedekterdi jumysqa ornalastyrý jónindegi máselelerge jańasha kózqaras qalyptasyp kele jatqany súısindirmeı qoımaıdy. Ekinshiden, olar úshin kedergisiz jaǵdaılar jasaý men týǵyzýǵa da jan-jaqty kóńil bólinýde.
– О́ıtkeni, qazir kóptegen áleýmettik jáne kólik ınfraqurylymy nysandary múgedek jandar úshin yńǵaısyzdyq pen qolaısyzdyq týǵyzyp júrgeni jasyryn emes. Sol úshin partııa fılıaly bastamasymen nysandardyń qoljetimdi kartasyn jasaý sharalary oılastyrylǵan. Buǵan qosa, ınklıýzıvtik bilim berý júıesin ornyqtyrý isi de jolǵa qoıylmaq. Qazirgi qazaqstandyq qoǵamda múmkindigi shekteýli jandardy barlyq jaǵynan qorǵaı alatyn quqyqtyq alań qalyptastyrý qajettigi de aıqyn kórinýde. Bul máseleni birinshi kezekte múmkindigi shekteýli jandardyń quqyqtaryn qorǵaý jónindegi arnaıy zań tarmaqtarymen retteýge bolatyny belgili. El Parlamentiniń depýtattary bul oraıda atalǵan zań jobasyn keshiktirmeı qaraıdy dep senim artamyz, – dedi gazet tilshisine «Nur Otan» partııasy Batys Qazaqstan oblystyq fılıaly tóraǵasynyń birinshi orynbasary Serik Súleımen.
Qazirgi kezde oblys turǵyndarynyń 3,8 paıyzyn múmkindigi shekteýli qamkóńil jandar quraıdy eken. Partııa fılıalyna qarasty qoǵamdyq qabyldaý bólmesine olardan túsken ótinishter men tilekterge úlken jaýapkershilik jáne sergek kóńil-kúımen qaraý daǵdysy ornyǵyp kele jatqany da atap aıtýǵa turarlyq másele. Iá, qalaı desek te, múmkindikteri shekteýli jandar men múgedekter qol qýsyryp qarap otyrǵan toptar emes. Olar da eńbek etip, belgili bir ónim óndiredi. Osy ónimderdi ótkizýge jeńildikter jasaýǵa yqpal etý tutqalaryn oılastyrý da fılıal qyzmetkerleri nazarynan tys qalmaǵan.
Osyndaı baıypty kózqaras kórinisteri qyzmet kórsetý mamandyqtaryna qaıta ázirleý, demalý men em alýǵa jaǵdaı jasaý, paraolımpıadalyq sportty jandandyrý sekildi ilkimdi isterden de óz nátıjesin tabatyn bolsa, nur ústine nur. Sondaı-aq, bıznestiń áleýmettik jaýapkershiligin búgingi atalǵan top ókilderine qatysty kóterý kerektigi de talas týǵyzbaıdy. Mine, «Nur Otan» partııasy oblystyq fılıaly kedergisiz bolashaq qurý jobasyn júzege asyrýǵa óz úlesterin osylaısha qosyp keledi.
Temir QUSAIYN,
«Egemen Qazaqstan».
Batys Qazaqstan oblysy.