«Astana Arena» stadıonynda klýb tarıhynda tuńǵysh ret otbasylyq úlken meıram bolyp ótti. «Astana» fýtbol ortalyǵynda tárbıelenetin jasóspirimderdiń ata-anasy, aty ańyzǵa aınalǵan fýtbolshylar men jankúıerler arasynda týrnır uıymdastyryldy, dep jazady Egemen.kz.
Atalǵan týrnır Qazaqstan Respýblıkasy Táýelsizdiginiń 30 jyldyǵyna arnaldy.
Týrnırdiń ashylý saltanatynda Mádenıet jáne sport mınıstrligi Sport jáne dene shynyqtyrý isteri komıteti tóraǵasynyń orynbasary Bekbolat Baıjanov, Qazaqstannyń kásipqoı fýtbol lıgasynyń Sport dırektory Pavel Demıan jáne «Astana» fýtbol klýbynyń Bas dırektory Tastanbek Esentaev sóz sóılep, jastarǵa tilegin arnady. Týrnırdiń qurmetti qonaǵy retinde negizgi quram oıynshylary Islambek Qýat, Ramazan Kárimov jáne Mádı Jaqypbaev qatysty.
Resmı bólimnen keıin 11 komanda oıynǵa kiristi. Týrınırge qatysýshylar arasynda qazaq fýtbolynda esimi kópke málim Qaırat Nurdáýletov pen Murat Tileshov bolsa, «12 Oıynshy» men «Old Boys» fan-klýb jankúıerleri de bir topqa birigip, týrnırdiń kórkin qyzdyrdy. Odan bólek, trıbýnada jınalǵan qaýym arasynda «Astana» fýtbol klýbynyń kádesyılary men túrli syılyqtar oınatyldy.
Týrnırdiń jabylý saltanatynda «Astana» fýtbol ortalyǵynyń 2003 jylǵy túlekteri marapattaldy. Eske salsaq, 2003-2004 jylǵy jasóspirimder komandasy bıyl el chempıony atanyp, keler jyly ÝEFA Jasóspirimder lıgasyna joldama alǵan bolatyn.
Seriktester men demeýshiler usynǵan sertıfıkattar men estelik syılyqtar týrnırge qatysqan jandarǵa tabystaldy.
Týrnırge qatysqan ár janǵa «Astana» fýtbol klýby bir jeńnen qol, bir jaǵadan bas shyǵarǵan, bir otbasydaı jumylyp, ıgi sharaǵa atsalysqany úshin alǵys joldap, bolashaqta osyndaı is-sharalardyń klýb tarıhynda jalǵasyn tabatynyna senim bildiredi.