Oblys ortalyǵyndaǵy jańadan turǵyzylatyn bul nysan – Jeńis merekesiniń 65 jyldyǵyna arnalyp soǵys ardagerlerine jasalǵan syılyq. El esinde júrgen osy bir saltanatty kúni oblys ákimi Baqytjan Saǵyntaev soǵys órtin kórgen ardager aqsaqaldardy shaqyryp, úlkendermen birge boı kótermekshi úıdiń irgetasyn qalady. Qazaqy sózben aıtsaq, alǵashqy qazyǵyn qaqty.
Kásipker Anatolıı Vınersev basqaratyn “Kazstroıımpýls” JShS júrgizetin turǵyn úı qurylysyna 370 mıllıon teńge bólingen. Bıylǵy jyldyń qarasha aıynda paıdalanýǵa beriletin jańa úı toǵyz qabatty, bir jáne eki bólmeli 108 páterden turady. Jańa turǵyn úı alańy bul aýdannan bekerden-beker tańdap alynbasa kerek. Dál osy jerde oblys ortalyǵynda ornalasqan Pavlodar aýdanynyń aýyl turǵyndaryna arnalǵan emhana bar. Jarqyrǵan jańa emhana – osy zamanǵy medısınalyq qural-jabdyqtarmen jabdyqtalǵan oblystaǵy birden-bir emdeý mekemesi. Endi aýyl turǵyndarymen birge, oblys ortalyǵynda turatyn soǵys ardagerleri de osy emhananyń qyzmetin paıdalanatyn bolady.
Al, jańadan boı kóteretin turǵyn úıdiń birinshi qabaty túgelimen ardagerlerdi jan-jaqty qamtamasyz etetin áleýmettik oryndarǵa arnalǵan. Maıdangerler ózderine arnap salynatyn úıdiń dańqty qolbasshy Mıhaıl Sývorov kóshesinen oryn tepkenin ózderiniń erlik joldarynyń jalǵasy retinde jarasym tapqanyna yrza. Jalpy, Jeńis merekesi kúni oblys ortalyǵyndaǵy Dańq alańynda oblystan shyqqan jerles batyrlar Qudaıbergen Suraǵanov, Ivan Kýdın, Spartak Makovskıı jáne basqalarǵa arnap olardyń músinderi ornatyldy. Otan soǵysy jyldarynda qaza tapqan jaýyngerlerge arnalǵan eskertkish qaıta jańǵyryp, jańartyldy.
Farıda BYQAI.
PAVLODAR.