Keshe Qazaqstannyń Ortalyq kommýnıkasııalar qyzmetinde Q.Sátbaev atyndaǵy Qazaq ulttyq tehnıkalyq ýnıversıtetiniń rektory Jeksenbek Ádilov pen Abaı atyndaǵy QazUPÝ-diń oqý isi jónindegi prorektory Aqtolqyn Qulsarıevanyń qatysýymen brıfıng ótti. Onda Elbasy N.Nazarbaevtyń «Qazaqstan joly – 2050: bir maqsat, bir múdde, bir bolashaq» atty Joldaýyndaǵy ulttyq bilim sapasyn jaqsartý, otandyq ǵylymnyń áleýetin kóterý týraly aıtqan oılary áńgimege arqaý boldy.
Aldymen sóz alǵan QazUTÝ rektory J.Ádilov elimizdiń ary qaraı damyp, álemniń órkenıetti otyz eliniń qataryna qosylýy qadamyna Memleket basshysynyń Joldaýy temirqazyq ispetti ekenin atap kórsetti. Ásirese, ǵylym men bilimniń damýy úshin aıtylǵan tapsyrmalar básekege qabiletti mamandar daıarlaýda, ǵylymnyń áleýetin kóterýde naqty ustanymǵa aınalýy tıis ekenin jetkizdi. «Elbasynyń mindetterin oryndaý barysynda, ıaǵnı ýnıversıtette oqý sapasyn joǵarylatý úshin jańa baǵdarlamalar jasaýdy qolǵa aldyq. Onyń ishinde «Ǵaryshtyq tehnıka jáne tehnologııa» mamandyǵyn, ıadrolyq energetıkalyq qurylǵylar men ıadrolyq hımııalyq tehnologııany jetildirý, atomdyq energetıka boıynsha bilim berý baǵdarlamasyn jasap shyǵý jáne ony engizý mindeti tur. Oqý ordamyz Qazaqstanda geologııalyq klaster qurý jumysyna, atap aıtqanda, paıdaly qazbalar qoryna boljam jasaýǵa, bolashaǵy bar ken oryndaryn anyqtaýǵa, «Kásibı ınjenerlerdi sertıfıkattaýdyń ulttyq júıesi» atty jobany jasaýǵa tikeleı qatyspaq nıettemiz» – dedi rektor. Ol jaqyn jyldarda ǵylym salasyn birshama jaqsy ózgerister kútip turǵanyn, onyń ǵylymǵa bólinetin qarajattyń ishki jalpy ónimniń 3 paıyzyn quraýymen tikeleı baılanysty ekenin atap ótti. Sondaı-aq, bolashaqta ýnıversıtetterdiń avtonomdy basqarý júıesine ótýi de básekelestikti arttyryp, otandyq ǵylymnyń kókjıegin keńeıtýge sebepshi bolatynyn tilge tıek etti. «Elimizde bul jańa úderiske 106 oqý orny daıar tur. Biraq, sonyń 5-6-ýy ǵana avtonomdy basqarylýy múmkin», – dep sózin túıindedi Jeksenbek Ádilov.
Abaı atyndaǵy QazUPÝ-diń oqý isi jónindegi prorektory Aqtolqyn Qulsarıeva Keńes Odaǵynda ǵylymǵa ishki jalpy ónimniń 4-5 paıyzy kóleminde qarajat bólingenin, bul sol tusta ǵylymnyń joǵary deńgeıge kóterilýine sebepshi bolǵanyn áńgimeledi. Qazir de damyǵan elderde ǵylymǵa sol kólemde qarajat bóletinin, óıtkeni, qoǵamdaǵy búkil salanyń alǵa basýy ǵylym-bilimmen tikeleı baılanysty ekenin atap ótti. Ol, sondaı-aq, osy kúnge deıin qoǵamymyzda ǵylym qarajatyn naqty salalarǵa bólý barysynda fýndamentaldi ǵylymdarǵa árqashan eń tómengi paıyz tıgenin baıandaı otyryp, aldaǵy ýaqytta osy másele oń sheshimin taýyp, ǵylymnyń barlyq salasyna qarajat teń bólinedi dep úmittenetinin alǵa tartty.
«Kásibı biligi joǵary mamandy daıarlap shyǵarý qajettiligi qaı kezde de mańyzdy bolǵan. Bul turǵyda qazirgi qoǵamda da kemshilikter joq emes. Ol kemshilikter barlyq mamandardy daıarlaý barysynda kezdesedi. Bizdiń teorııadan praktıkaǵa kóbirek kóńil bóletin kezimiz keldi», – dedi ol.
Aıgúl SEIILOVA,
«Egemen Qazaqstan».