Prezıdent Qasym-Jomart Toqaev elimizde qalyptasqan jaǵdaıdy túbegeıli ózgertýge múddeli ekenin kórsetti. Bul týraly Qazaqstan Respýblıkasy Parlamenti Senatynyń depýtaty Lázzat Súleımen aıtty, dep habarlaıdy Egemen.kz.
«Eń aldymenen bılik halyqtyń senimin qaıtaryp alýy kerek. Bılik halyqqa esepte bolýy jáne bılikpen halyq birge bolýy kerek. Bul halyqtyń da aıtyp otyrǵan talaby.
Memleket basshysy qazirgi qoǵamda áleýmettik-ekonomıkalyq ádiletsizdik týǵyzyp otyrǵan máselelerdi tizip aıtyp, memlekettik ınstıtýttardy qalaı damytý kerektigi týraly naqty baǵyttar berdi. Egerde ol nátıje bermese, ol ınstıtýttardyń taratylatyndyǵy týraly aıtty. Bul halyqtyń ál-aýqatyn jaqsartýǵa yqpal etedi jáne jastardyń, ásirese, jumyssyz jastardyń ekonomıkanyń bir múshesi ekenin sezinýlerine múmkindik beredi», deıdi ol.
Sondaı-aq depýtat búgin bekitilgen Premer-mınıstrdiń kandıdatýrasyn qoldaıtynyn jetkizdi.
«Árıne, Smaıylovtyń úkimetine syn da, úmit de kóp bolady. Sondyqtan da bul Úkimetten kúterimiz kóp. Ekonomıkalyq reformalardy tezdetip júzege asyrýymyz kerek.
Al endi osylardyń bárin júzege asyrý úshin bılikte halyqtyń ózinen shyqqan, halyqqa jany ashıtyn, óz múddesinen halyqtyń múddesin joǵary qoıatyn azamattar bolý kerek. Bizde basqa jol joq», dedi Lázzat Súleımen.