Kıpr ǵalymdary koronavırýstyń «Delta», «Omıkron» shtamdarynyń gıbrıdti túrin tapqanyn habarlady. Kıpr ýnıversıtetindegi Bıotehnologııa men molekýlıarly vırýsologııa laboratorııasynda jumys isteıtin bir top ǵalym ony «Deltakron» dep atady.
Kıpr ýnıversıtetiniń professory Leontıos Kostrıkıs «Deltakronnyń» «Deltamen» genetıkalyq negizi bir jáne sonymen birge «Omıkronǵa» tán mýtasııalary bar degen pikir aıtady. «Omıkronnyń basqa shtamdardan ereksheligi – onyń genomynda 30 túrli mýtasııa bar. Olardyń ondyǵy atalǵan úlgilerde anyqtaldy», dep túsindirdi ǵalym.
Ońtústik Afrıkadan kelgen ımmýnologter «Omıkrondy» COVID-19 pandemııasynyń jedel kezeńiniń aıaqtalýymen jáne belgili bir aýmaqqa tán bolatynymen baılanystyrdy.
Zertteýshiler «Omıkron» jáne buryn anyqtalǵan shtamdardy juqtyrǵan 466 pasıenttiń derekterin zerttep, COVID-19 jaǵdaılarynyń tek 4,5%-y osy tolqyn kezinde aýrýhanada qaıtys bolǵanyn anyqtady. Sondaı-aq stasıonarda bolýdyń ortasha uzaqtyǵy burynǵy 8 kúnnen 4 kúnge, al jansaqtaý bólimderine jatqyzylǵandar sany – 4,3-ten 1 %-ǵa deıin qysqardy.
Degenmen Dúnıejúzilik densaýlyq saqtaý uıymy tehnıkalyq tobynyń jetekshisi Marııa van Kerkhove bul jańalyqty teriske shyǵardy. Ol áleýmettik jelidegi paraqshasyna «Deltakron» degen shtamnyń paıda bolýy ekitalaı degen pikirin jazdy. Onyń oıynsha, vırýstan COVID-19 shtamdarynyń kombınasııasy anyqtalmaǵan, al ǵalymdardyń «jańalyǵy» aldyńǵy túrdiń lastanýynan paıda bolǵan. Uıym ǵalymdary «Genetıkalyq qatelik laboratorııalyq qatelikke alyp keldi» degen oıda.