Baǵlanova Baı-О́lkege barǵanda

Roza Tájibaıqyzy jaıly anyq­tamalyqta, ánshi apamyz 1949 jyly jastardyń dúnıejúzilik festıvali ótken Majarstan astanasy Býda­peshtte óner kórsetýmen qatar, Cheho­slovakııa, Germanııa, Aýstrııa, Polsha elderin aralap qazaq ánin áıgilegen. Odan keıin­gi jylymyq jyldary AQSh, Fran­sııa, Danııa, Kanada, Ispa­nııa, Japonııa, Koreıa, Qytaı, Iran sııaqty ondaǵan memle­ket­tiń sahnalarynda, álem halyq­tarynyń otyzdan astam tilinde shyrqaǵany jaıly derek bar.

Osy oraıda, ánshi apamyz 1963 jyldyń shilde aıynda Mońǵolııa eline, sonyń ishinde qazaqtar shoǵyr qonystanǵan Baı-О́lke aımaǵyna baryp, Qob­danyń qońyr taýlaryn pa­na­laǵan, syrtqy dúnıemen asa bir qatty qarym-qatynasy joq buıyǵy qazaqtardyń ortasynda óner kórsetken eken. Oǵan myna qoldaryńyzdaǵy foto dálel. Bul beıne áýejaıda túsirilipti. Úsh áıel tur. Ortasynda Roza apamyz. Fonda AN-24 ushaǵy. Iаǵnı aımaq sahnasynda óner kórsetken ataqty apalaryn baı-ólkelik sińlileri Ulanbatyrǵa attandyryp salyp tur. Ánshi apamyzdyń oń qol ja­ǵynda tur­­ǵan aımaqtyq mýzyka­ly dra­­­ma teatrynyń bıshisi Ka­shı­pa Qusaıynqyzy bolsa, sol qo­­lynan ustap turǵan adam ta­lant­ty ánshi ári drama ártisi Ser­­keshhan Omarqajyqyzy eken.

Kónekózderdiń aıtýyna qa­ra­ǵanda, álemniń nebir atshaptyrym sahnalarynda án salyp úıren­gen apamyz aımaq ortalyǵyndaǵy 200 adamdyq shaǵyn klýbty men­sinbeı, qatty qońyltaqsyǵan kórinedi. Onyń da jóni bar. О́ıtkeni ataǵy álemge jaıylǵan ánge ede­ni shıqyldap, esigi qıqyldap tur­ǵan aýyl sahnasy qorash bolmaı qaıtsin endi. Onyń syrtynda, Keńes­tik Qazaqstannyń Halyq ár­ti­si degen ataǵy bar. Sóıtip, bi­raz nazdanyp alǵan apamyz kóp ke­shikpeı, Qob­danyń qo­ńyr dalasyn ánge bólegen eken. О́ıtkeni budan da qıyn kúnderi, ıaǵnı 1942 jyly Soltústik-Batys maıdan shebinde tanktiń ústinde turyp án salǵan adam emes pe?! Sóıtip, Baǵlanova­nyń Baı-О́lkede izi qalǵan. Oǵan joǵaryda atap ótkenimizdeı my­na bir foto kýá.

Apamyzdyń oń jaǵynda tur­ǵan Kashıpa apamyz 1940 jyly týǵan. Uzaq jyl aımaqtyq mýzykaly drama teatrynda bı­shi-solıst mindetin oıdaǵydaı atqaryp, aýmaqtyq dárgeıde depýtat bolýmen qatar, «Eńbek dańqy» medaliniń ıegeri atan­ǵany bar. 1993 jyly zeınetke shyǵyp, atamekenge at basyn burǵan. Qazir Pavlodar oblysy, Maı aýdany, Kóktóbe aýylynda turady.

Al sol jaǵynda turǵan Ser­keshhan Omarǵajyqyzy 1941 jyly týǵan ári ólkege tanymal drama ártisi. 15 jasynan bastap, ártúrli sahnada óner kórsetken. О́lkeniń óner shejiresi Taıf Taýkeıulynyń 2018 jyly Ulan­batyr qalasynda jaryq kór­gen «Mońǵolııa qazaq­tarynyń ­teatr tarlandary» atty derekti eńbeginde: «Serkeshhan 1956 jyly emtıhan tapsyryp ár­tistikke qabyldandy. Ol M.Áýe­zovtiń «Eńlik-Kebeginde» Eń­­lik­tiń, «Qozy Kórpesh-Baıan sulý­da» Kúnikeıdiń, Gogoldiń «Revı­zorynda» dýanbasynyń qyzy Ma­rııanyń, Ǵ.Músirepovtiń «Aqan seri − Aqtoqtysynda» Dámeliniń rólin naqyshyna keltirip somdaı aldy. О́te qabi­letti adam. Jıyrma shaqty bet­tik mátindi úsh oqyǵanda jattap alatyn edi» dep jazypty. Jaryqtyq apamyz 2011 jyly ómirden ozyp, jambasy týǵan jerine tıgen eken.