Prezıdent Qasym-Jomart Toqaev Parlament Májilisinde sóılegen sózinde qoǵamǵa jańa Qazaqstandy birge quraıyq degen usynys tastady. Meniń oıymsha, bul – úlken jaýapkershilikti talap etetin dúnıe.
Biz ótken otyz jyldaǵy qatelikterdi, kemshilikterdi tizbelep, oǵan baǵasyn bermeı jáne qańtardaǵy qaıǵyly oqıǵaǵa sáıkesinshe shynaıy baǵa bermeı, jańa Qazaqstandy quraıyq degen sóz, menińshe, bul manıpýlıasııa sııaqty. О́tkenge kóz tastamaı, «jabýly qazan jabýly kúıinde qala bersin», biz endi jańasha ómir bastaımyz degen bul – ıllıýzııa. Qańtar aıynyń shyndyǵy áli tolyq ashylǵan joq. Qaıtys bolǵan adamdardyń kim ekeni, qandaı jaǵdaıda qaıtys bolǵanyn qoǵam tolyq bilmeıdi. Oǵan kim jaýap beredi? Bılik basyndaǵylardyń, onyń ishinde Memleket basshysynyń jaýapkershiligi qandaı?
Sol sebepti meniń oıymsha, eshqandaı da áleýmettik sheshimder, ekonomıkalyq jeńildikter bizdi alǵa jyljytýǵa múmkindik bermeıdi. Sebebi bizdi qańtar aıynyń tragedııasy aıaǵymyzdan baılaıtyn úlken tusaý. Sondyqtan máseleni qarjy bólý arqyly sheshe almaımyz. Qazir bizdiń qoǵamǵa keregi – shyndyqtyń ashylýy, bıliktiń jaýapkershilikti ózine alýy. Sherýge shyqqandardy terrorıst, buzaqylar dep tek bir jaqty baǵa emes, jan-jaqty, shynaıy baǵa berilýi kerek. Eń aldymen, memlekettik tóńkeris jasaýǵa qandaı da bir toptyń, adamdardyń jospary bolsa, sol jospary naqty, ashyq aıtylýy kerek. Sol suraqtardyń bárine jaýap alynbaı, jańa Qazaqstandy qurý degenniń ózektiligi joq.
Serik BEISEMBAEV,
áleýmettanýshy,
Sıfrlyq zertteý ortalyǵynyń jetekshisi