Beıjiń Olımpıadasynda Qazaqstan atynan jeti shańǵyshy synǵa túsedi. Bul týraly komandanyń bas bapkeri Aleksandr Batıaıkın málimdedi, dep habarlaıdy Egemen.kz UOK taratqan aqparatqa súıenip.
Qysqy oıyndarda eki er adam men bes áıel adam synǵa túsedi. Jarys jolyna Ksenııa Shalygına, Valerııa Tıýleneva, Irına Bykova, Nadejda Stepashına, Angelına Shýryga, Vıtalıı Pýhkalo jáne Evgenıı Velıchko shyǵady.
«Komanda quramy bekitildi. Beıjińge Ksenııa Shalygına, Valerııa Tıýleneva, Irına Bykova, Nadejda Stepashına, Angelına Shýryga, Vıtalıı Pýhkalo jáne Evgenıı Velıchko attanady. Bapkerler quramyna men, Vladımır Borsov pen Andreı Nevzorov endi.
Alǵashynda segiz joldama alamyz dep josparalaǵanbyz. Alaıda, bir kvotaǵa qolymyz jetken joq. Men erler men áıelder arasyndaǵy eki estafetaǵa da qatysamyz dep oılaǵan edim. Biz pandemııa men shekteýlerge baılanysty biraz týrnırge qatysa almadyq. Tek qana Germanııanyń Oberstdorf qalasynda ótken álem birinshiliginde ǵana baq synadyq.
Olımpıadada bizdiń sportshylar barlyq qashyqtyqtar boıynsha synǵa túsedi. Tek estafetadan syrt qalamyz. Qazirgi tańda komanda músheleri Italııada oqý-jattyǵý jıynyn ótkizip jatyr. Olımpıadaǵa 29 qańtar kúni ushyp baramyz», dedi Batıaıkın.