Elorda ákimi Altaı Kólginov óziniń Instagram paraqshasynda qalanyń sol jaǵalaýynda Oqýshylar saraıynyń qurylysy bastalǵanyn habarlady, dep jazady Egemen.kz.
«Buǵan deıin «Nomad», «Sarmat», «Infınıtı» jáne t.b. turǵyn úı keshenderiniń turǵyndary sol jaǵalaýda Oqýshylar saraıyn, jańa mektep pen skverdi salý máseleleri boıynsha ótinish bildirgen bolatyn. Máselen, Turan dańǵyly boıynsha jeke ınvestısııalardy tartý esebinen Oqýshylar saraıynyń qurylysy bastaldy», dep jazdy qala ákimi.
Qazirgi ýaqytta alańdy bólshekteý jáne tegisteý jumystary júrgizilýde. Oqýshylar saraıynyń jalpy aýdany shamamen 5 myń m2 quraıdy. Keshende basseın, robototehnıka jáne IT-baǵdarlamalaý kabınetterin, horeografııa, sporttyq-bal bıleri, gımnastıka, shahmat jáne t.b. zaldary ashý josparlanýda, ekinshi oqýshylar saraıy sol jaǵalaýda qalalyqtardyń ótinishi boıynsha tańdap alyndy, óıtkeni birinshi oqýshylar saraıy oń jaǵalaýda ornalasqan.
«Birneshe TK turǵyndary kótergen ekinshi másele-mektep qurylysy. Qabanbaı batyr dańǵyly men Syǵanaq kóshesiniń qıylysy aýdanynda «Pokolenıe» TK aýdanynda 2400 oryndyq mektep salamyz. Sonymen qatar, oqýshy oryndarynyń tapshylyǵyn qysqartý maqsatynda № 59 mektep aýmaǵynda (Saýran kóshesi, 5/1) 1200 oryndyq taǵy bir korpýs salamyz. Naýryz aıynyń sońyna deıin jobalyq-smetalyq qujattamanyń memlekettik saraptamadan shyǵýyn kútip, sáýirde mektep qurylysyna konkýrs jarııalaımyz. Bıylǵy jyly oqý ornynyń qurylysyna qarajat qarastyryldy», dep jazdy Altaı Kólginov.