Memleket basshysy Qasym-Jomart Toqaev Qazaqstan arnasyna bergen arnaıy suhbatynda qańtar qasiretinde Prezıdent retinde qandaı oı túıgenin aıtyp berdi, dep habarlaıdy Egemen.kz.
Qańtardyń qasiretti kúnderinde halqymyz basynan qıyn sátterdi ótkerdi. Lańkester eldegi jaǵdaıdy paıdalanyp, egemendigimizge qol suqpaq boldy. Dese de, Táýelsizdigimizdi saqtaı aldyq. Árqaısymyz da budan oı túıdik. Osy arada Qasym-Jomart Toqaev bul oqıǵadan Prezıdent retinde qandaı sabaq alǵanyn aıtty.
«Men Memleket basshysy retinde Nursultan Ábishuly Nazarbaevtyń eńbegin joqqa shyǵarýǵa bolmaıdy dep oılaımyn. Tarıhqa qııanat jasamaý kerek. Onyń qyzmetine ádil baǵa berýimiz kerek. Tuńǵysh Prezıdenttiń kemshilikteri bolsa, odan jas basshylar sabaq alýy kerek. Qańtar oqıǵasy elimizge de, meniń ózime de úlken sabaq bolǵany sózsiz. Tıisti qorytyndy jasaldy. Qazir elimizde bolyp jatqan saıası sheshimder - sonyń nátıjesi. Aldymyzda óte kóp jumys bar. Muny barlyǵy kórip, bilip otyr dep oılaımyn», dedi Prezıdent.