Sharýa adamy qashanda aýa raıynyń qas-qabaǵyn qaraılaı júretini belgili. Ásirese, dıqan qaýymy. Sońǵy jyldary qýańshylyqtyń quryǵynan shyǵa almaı júrgen aqtóbelik eginshiler bıylǵy kóktemnen úlken úmit kútip otyr. Onyń da reti bar, byltyr kúz jaýyn-shashyndy boldy, qysta qar mol tústi. «Qazgıdromet» RMK derekteri boıynsha, ótken jyldyń qazan aıy men ústimizdegi jyldyń naýryz aıy aralyǵynda oblys boıynsha ortasha 151,2 mm. ylǵal túsken. Bul 2012 jylǵy deńgeıden 60 paıyzǵa joǵary. Ylǵaldyń moldyǵy jeri qunarlylaý Mártók, Áıteke bı, Hromtaý aýdandarynda baıqalady. Munyń ózi dıqan qaýymynyń boıynda mol astyqqa degen senim uıalatady.
Ústimizdegi jyly aqtóbelik eginshiler 667,6 myń gektarǵa aýyl sharýashylyǵy daqyldaryn sepkeli otyr. Onyń 505,5 myń gektary dándi daqyldar, al, 107,5 myń gektary mal azyqtyq daqyldar. Sondaı-aq, 45 myń gektarǵa maıly daqyldar, 5,3 myń gektarǵa kartop jáne 3,9 gektarǵa baqsha daqyldaryn ósirý kózdelýde. Jalpy, sońǵy jyldary egis alqaptarynyń qurylymyn ártaraptandyrý nátıjesinde mal azyqtyq daqyl alqaptaryn keńeıýge baǵyt ustalýda. 2011 jyly bıdaı alqaby jalpy egis kóleminde 71 paıyzdy qurasa, ótken jyly 58 paıyz boldy. Al mal azyqtyq daqyldar alqaby osy kezeńde tıisinshe 75,5 myń gektarǵa ornalastyrylsa, bıyl 176,6 myń gektar bolǵaly otyr.
О́tken jyly ústimizdegi jyldyń egisine 262 myń gektar jer daıyndaldy, onyń 151,1 myń gektary qaıyrylyp jyrtylsa, 111 myń gektaryna súdiger kóterildi. Sonymen birge 263,7 myń gektarǵa qar toqtatyldy.
Qazir kóktemgi egis júrgizýge qolda 6,4 myń traktor, 107 joǵary tehnologııaly egis kesheni, 4,5 tuqym sepkish,1,6 myń topyraq óńdeý agregaty, 1,8 myń júk avtokóligi jáne 2,9 myń tirkeme bar. Qolda bar tehnıkanyń jaraqtylyǵy qazirgi tańda 90 paıyzdy quraıdy. О́tken jyly aýyl sharýashylyǵy taýar óndirýshileri 309 jańa tehnıka satyp alǵan.
– Qar erip, kóktem shyǵa dıqan qaýymy erteńgi kúnge úmit arta qımyldaıdy. Burynǵy jyldarmen salystyrǵanda, topyraqtyń ylǵaly da anaǵurlym joǵary. Sondyqtan dıqan qaýymy kóktemgi egiske tııanaqty daıyndalý qamynda. Áli de alqapqa shyǵýǵa ýaqyt bar. Qolda bar tehnıka tolyqtaı daıyndyq sapyna qoıylady. Kóktemgi egisti mejeli ýaqytta ótkizýdiń múmkindigi mol, – deıdi oblystyq aýyl sharýashylyǵy basqarmasynyń basshysy Muhtar Jumaǵazıev.
Onyń aıtýynsha, tuqym sharýashylyǵyn qoldaýǵa 154,0 mıllıon teńge qarjy bólingen. Budan basqa tuqymdyq aýyl sharýashylyǵy daqyldaryna tólenetin bıýdjettik sýbsıdııa mólsheri arttyrylǵan. Munyń ózi eginshilerdi yntalandyra túseri sózsiz.
Satybaldy SÁÝIRBAI,
«Egemen Qazaqstan».
Aqtóbe oblysy.