Nur Otan partııasynyń Amanat dep atalýy, Prezıdent Q.Toqaev aıtqandaı, syrtqy ózgerister emes, ishki, túbegeıli saıası jáne rýhanı jańǵyrýlarmen tikeleı baılanysty.
Amanat uǵymy – qazaq halqynyń ulttyq kodynyń kilti, adamgershiliktiń tutqasy, dúnıetanymynyń negizi. Amanat joly – ádilettilik pen jaýapkershilik. Ol – ar men namys, sóz ben istiń birligi, adamgershilik pen rýhanı tazalyqtyń joly. Ata-babamyzdyń bizge qaldyrǵan amanaty – el men jer tutastyǵy, el táýelsizdigi, tili men dini, salty men dástúri. Sol sebepti saıası partııanyń «Amanat» atalýy – quptarlyq dúnıe.
Burynǵy ata-babalarymyz «amanatqa qııanat júrmeıdi» degen qaǵıdany ult mentalıtetiniń temirqazyǵy etip ustanǵan. Búginde amanat uǵymynyń saıası astaryna da nazar aýdaratyn ýaqyt jetti. Máselen, bıliktiń halyqqa qyzmet etýi, halyq múddesin jeke bastyń múddesinen qashanda joǵary qoıý, ádilettilikti, zańdy qoǵam damýynyń negizi retinde qaraý da ata-babalarymyzdyń amanaty ekenin esten shyǵarmaǵanymyz abzal. Mine, Amanat partııasynyń jańa kezeńdegi basty mindetteri. Sonymen qatar Amanat partııasy sentrıstik sıpatta damıtyn partııa bolǵasyn ulttyń ózindik sanasynyń ósýine, memlekettiń tutastyǵyna qaýip tóndiretin separatızmniń, ekstremızmniń qandaı da bir kórinisterine jol bermeýdiń mańyzdylyǵyn únemi nazarda ustap, oǵan saıası turǵydan baǵa berýge daıyn bolýy tıis. Osy turǵydan kelgende, Saıası menedjment akademııasy aldynda jańa sıpattaǵy, jańa zaman talabyna saı keletin saıası menedjerlerdi daıarlaý máselesi kún tártibinde tur. Olardyń boıynda memlekettiń, ulttyń, eldiń múddesin qorǵaı alatyn qasıetterdi qalyptastyrý jáne bul jolda olardyń saıası bilimi men synı oılaý mádenıetin, kommýnıkatıvtik quzyrettiligin damytýdyń mańyzy zor. Jarııalylyq qandaı da bolsyn saıasattyń negizi dep tanıtyn bolsaq, depýtattar qoǵamdyq oıdy, pikirdi qalyptastyrýdyń lokomotıvi, jetekshi kúshi bolýǵa tıis. Ol úshin onyń ózindik pikiri men oıy bolýy qajet. Bul jaǵynan kelgende, búgingi depýtattarda keshegi qalyptasqan stereotıpter men úreı, jaltaqtyq basym. Demek olarǵa rýhanı jáne júıeli oılaý turǵysynan arylý qajettigi baıqalady.
Amanat partııasynyń aldynda turǵan taǵy bir mindet – ulttyq ıdeologııa máselesi. Bıliktiń murageri jeke tulǵa emes, onyń ulttyq qundylyqtarǵa negizdelgen ıdeologııasy. Tek sońǵysy ǵana qoǵamnyń turaqtylyǵy men órkenıettiligin qamtamasyz ete alady. Ony keshegi qańtar oqıǵasy kórsetip berdi. Ideologııa jeke adamnyń armany men qalaýy úshin jumys istemeýi kerek ekendigin endi sezingendeımiz. Jalpy, qandaı da bolsyn partııanyń ıdeologııasyz ómir súrýi múmkin emes. Demek jańa partııaǵa jańa ıdeologııa qajet. Ol qoǵamnyń progressıvtik damýyna yqpal ete alatyn, qoǵamdy basty qundylyqtar negizinde toptastyratyn, shynaıylyq pen ádilettilikke, jasampazdyqqa negizdelgen táýelsiz ıdeologııa bolýǵa tıis. Ol aqparattyq qoǵam jaǵdaıynda syrtqy destrýktıvtik kúshterge, geosaıası jaǵdaıda agressıvtik sıpattaǵy basqa memlekettiń ıdeologııalaryna toıtarys bere alatyndaı ıdeologııa bolýy kerek. Ideologııalyq toqyraýdy eńserý, oǵan jańa Qazaqstan jaǵdaıynda jańasha lep berý – Amanat partııasy aldyndaǵy mindettiń biri.
Amanat partııasy ulttyq baılyqty ádilettilik turǵysynan qorǵaýǵa atsalysýy kerek. Ulttyq baılyq tek ekonomıkalyq uǵym ǵana emes. Ulttyq baılyqqa rýhanı-mádenı, ıntellektýaldyq, adamı resýrstardy da jatqyzýǵa bolady. Osy turǵydan kelgende partııa aldynda atqarylatyn qyrýar sharýa tur. Ásirese bilim, ǵylym, densaýlyq, mádenıet, óner, sport salalaryndaǵy máseleler partııa nazarynan tysqary qalmaýy kerek. Ulttyń tili men dini, dili de – ulttyń baılyǵy. Qysqasy, jańa partııa ulttyq baılyqqa degen qoǵamdaǵy tutynýshylyq kózqarasty joıýdy alǵa qoıýy qajet. Ol úshin ózi de jattandy yrǵaqqa terbelip, barǵa máz bolyp otyra bermeı, sózden iske kirisýi kerek. Sonda ǵana Amanat partııasy atyna zaty saı bolmaqshy.
Tóleýǵalı BО́RIBAEV,
Qazaqstan Respýblıkasy Joǵarǵy Soty
janyndaǵy Sot tóreligi
akademııasynyń
professory, fılosofııa ǵylymdarynyń doktory