Jańa Qazaqstan jastarynyń róli sóz boldy

«Qazaqstan Respýblıkasy Prezıdentiniń reformalary: jastardyń róli men úlesi» taqyrybyndaǵy kezdesý barysynda Memleket basshysynyń eldi jańǵyrtý jónindegi bas­tamalary men partııalyq jańa­rý máseleleri talqylandy. Se­natorlar Prezıdent Qasym-Jomart Toqaevtyń qazaq­stan­dyqtardyń tabysy men ómir súrý deńgeıin arttyrý jónindegi «Jańa Qazaqstan» reformasynda kózdelgen baǵyttar týraly egjeı-tegjeıli aıtyp berdi.

Stýdentter bolashaq maman retinde elimizdegi jumyssyzdyq máseleleriniń sheshilýine nazar aýdardy. Senattyń Áleýmettik-mádenı damý jáne ǵylym komıtetiniń tóraǵasy B.Isabaev Prezıdenttiń tapsyrmasy boıynsha halyqty jumyspen qamtý jáne jumys oryndaryn kóbeıtý úshin qazirdiń ózinde 10 ulttyq joba iske asyp jatqanyn, ol 2025 jylǵa deıin júzdegen myń jańa jumys oryndaryn ashýǵa yqpal etetinin atap ótti. Senator áleýmettik saladaǵy jastarǵa tikeleı áser etetin reformalarǵa da toqtaldy. «Iri qalalarda satyp alynbaıtyn, jastarǵa jalǵa beriletin turǵyn úı berý baǵdarlamasy iske qosyldy. Qazirdiń ózinde asa mańyz­dy qujat – Áleýmettik kodeks ázirlenip jatyr. Kodeks aıasynda azamattardyń áleýmettik quqyqtary júıelenip, eń tómengi áleýmettik standarttar júzege asatyn bolady. «Jastar tájirıbesi» jáne «Alǵashqy jumys orny» jobalaryna qatysý kezeńiniń merzimi men eńbekaqy mólsheri ulǵaıtyldy», dedi senator.

A.Kúrishbaev joǵary oqý oryndarynda jastardy tár­bıeleýdiń ulttyq qun­dy­lyq­tarǵa negizdelgen turaqty júıesin qurýdyń mańyz­dy­lyǵyn aıtty. «Memle­ket basshysy jańa syn-tegeý­rinderge qarsy turý úshin ulttyq qun­dylyqtardy qorǵaı bilý kerek­tigin atap ótken bolatyn. Biz joǵary bilim alyp jatqan jastarymyzǵa zor úmit­pen qaraımyz, ol Prezıdent aıt­qan eldiń ekonomıkalyq jańǵyrýynyń alǵy leginde bolyp, aǵa býynnyń jasam­paz ister estafetasyn jal­ǵastyrýǵa tıis. Ol biz­diń qoǵamnyń turaqty da­mýy­nyń negizi – halyqtyń bir­ligi, onyń mádenıeti, tili men dástúrleri sııaqty basty qun­dylyqtarymyzdy qorǵap, kóbeıtýi kerek», dedi senator.

Kezdesýde partııalyq ja­ńa­rýlar máselesi de tal­qy­landy. B.Isabaev Ama­nat par­tııa­synyń qyzmetin jań­ǵyr­týǵa baǵyttalǵan Memleket basshysy alǵa qoıǵan basym mindetter týraly aıtty. «Saıası kadrlar daıarlaý – Ama­nat partııasynyń mańyzdy basymdyǵy. Sizderge jas býyn ókilderi retinde oıymdy jetkizgim keledi. Belsendi bo­lyp, óz joldaryńyzdy taýyp, taǵdyrdyń kirpishi bolyp qalansańyzdar deımin. Son­daı-aq saıası partııalardyń jumysyna qatysý da mańyzdy. Eldiń bolashaǵy osyǵan tikeleı baılanysty. Bizdiń Amanat partııasy jas urpaqqa senim artatyn bolady», dedi senator.

Stýdentter kezdesý barysynda áleýmettik ádil lıfti bolýyn qamtamasyz etý, teh­nıkalyq kadr daıarlaý, kóp­balaly otbasylardyń problemalaryn sheshý, aýyldardy damytý jáne basqa da máseleler boıynsha ózderin tolǵandyrǵan saýaldaryn qoıdy.