Aqpan aıynda jedel-izdestirý is-sharalary barysynda kúrtesiniń oń jaq syrtqy qaltasynda óz atyna polısııa qyzmetkeriniń qujatyn saqtaǵan 21 jastaǵy qala turǵyny ustaldy. Keıin tabylǵan qujattyń jalǵan ekeni belgili boldy, dep habarlaıdy Egemen.kz Polisia.kz-ke silteme jasap.
Kúdikti «qujattyń syrtyn» satyp alǵan jáne polısııa qyzmetkeriniń qyzmettik kýáliginiń úlgisin taýyp alyp, ony ózine qaıta jasaǵany anyqtaldy.
Qujatta polıseı ýchaskelik polısııa ınspektory retinde tirkelgen. Semeılik bul iske baıyppen qarap, tipti fotoshoptyń kómegimen tártip saqshysy keıpindegi sýret jasap alǵan. Osylaısha, ol ýchaskelik polısııa qyzmetkerine aınalǵan.
Ustalǵan azamat óziniń dostaryn tánti etý úshin feık jasaǵanyn aıtyp, óz kinásin moıyndady.
Oǵan qatysty mindetteý túrindegi prosessýaldyq májbúrleý sharasy tańdaldy. Qazirgi ýaqytta sanksııasy eki jylǵa deıin bas bostandyǵynan aıyrý kózdelgen QR QK 385-baby 1-bóligi (Jalǵan qujattardy daıyndaý) boıynsha sotqa deıingi tergeý júrgizilýde.