Kepildik berilgen ótemdi tóleý aıaqtalatyn kún jáne talap etilmegen ótem somasyn BJZQ-ǵa aýdarý týraly
Qazaqstannyń depozıtterge kepildik berý qory (Qor) «Valıýt-Tranzıt Bank» AQ, «Qazınvestbank» AQ, «Delta Bank» AQ, «Eksımbank Qazaqstan» AQ, «Qazaq Banki» AQ, «Astana Banki» AQ, «Tengri Bank» AQ jáne «AsiaCredit Bank (AzııaKredıt Bank)» AQ salymshylarynan kepildik berilgen ótemdi tóleýge ótinish qabyldaý 2022 jyldyń 1 mamyrynda aıaqtalatyndyǵyn habarlaıdy.
Atalǵan bankterdiń depozıtorlarynyń (sońǵy kúndi qosa alǵanda) 2022 jyldyń 1 mamyryna deıin talap etpegen ótem somalary olardyń «Biryńǵaı jınaqtaýshy zeınetaqy qory» AQ-taǵy (BJZQ) jeke zeınetaqy shottaryna aýdarylady. Eger BJZQ-da salymshynyń erikti zeınetaqy jarnalaryn esepke alýǵa arnalǵan jeke zeınetaqy shoty joq bolsa, ol avtomatty túrde ashylady. Sondyqtan Qor salymshylarǵa kepildik berilgen ótemdi alý úshin 2022 jyldyń 1 mamyryna deıin ótem alýǵa ótinish berýge keńes beredi.
Kepildik berilgen ótemdi alýǵa ótinishti tólemderdiń elektrondy portaly: https://clients.kdif.kz/ arqyly onlaın túrinde berýge bolady (portalǵa ótý sondaı-aq Qor saıtynyń negizgi betinde qamtamasyz etilgen). Tólemdi osylaı alý tásili tek shottardyń, tólem kartochkalary men salymdardyń ıelerine ǵana qoljetimdi jáne tolyǵymen qashyqtyq formatynda júzege asyrylady. Bul rette Qor kepildik berilgen ótemdi ótinish kelip túsken kúnnen bastap 5 jumys kúni ishinde salymshynyń ótinishinde kórsetilgen qoldanystaǵy bank shotyna aýdarady. Nazar aýdaryńyzdar, dástúrli banktik qyzmet kórsetý tásilin qalaıtyn salymshylar, sondaı-aq olardyń atynan ótem alatyn úshinshi tulǵalar (muragerler, senimhat boıynsha ókilder jáne basqa da quqyq ıelenýshiler) úshin ótinishti jazbasha túrde agent bankke berý arqyly ótem alý tártibi saqtalady. Agent bankter jáne olardyń baılanys derekteri týraly aqparat Qor saıtynda kórsetilgen. «Valıýt-Tranzıt Bank» AQ salymshylary kepildik berilgen ótemdi alý úshin Qorǵa nemese banktiń taratý komıssııasyna myna mekenjaı boıynsha júgine alady: Qaraǵandy q., Buqar jyraý dańǵyly, 51/4.
Tólem merzimi ishinde dáleldi sebeptermen ótem alyp úlgermegen salymshylar úshin kepildik berilgen ótemdi tólem merzimi aıaqtalatyn merzim – 2022 jyldyń 1 mamyrynan keıin de alý quqyǵy saqtalatyndyǵyn qosymsha habarlaımyz. Kepildik berilgen ótemdi alýǵa ótinish dáleldi sebepterdi rastaıtyn qujattarmen birge jazbasha túrde beriledi. Dáleldi sebepterdiń tizimi «Qazaqstan Respýblıkasynyń ekinshi deńgeıdegi bankterinde ornalastyrylǵan depozıtterge mindetti kepildik berý týraly» zańda belgilengen.
Bul rette ótinish Qorǵa bankti májbúrlep taratý týraly málimetter Bıznes-sáıkestendirý nómirleriniń ulttyq tizilimine engizilgen kúnge deıin nemese ótem somasy BJZQ-ǵa aýdarylǵan jaǵdaıda, erikti zeınetaqy jarnalary esebinen zeınetaqy alý quqyǵy týyndaǵan sátke deıin beriledi.