Elorda tórinde Halyqaralyq «Qazaq tili» qoǵamynyń astanalyq fılıaly uıymdastyrýymen Qazaq tili men mádenıetiniń I forýmy ótti. Is-sharaǵa Nur-Sultan qalasy ákimdigi, «Altyn qyran» kompanııalar toby, Halyqaralyq «Bolashaq» stıpendıattar qaýymdastyǵy qatarly uıymdar qoldaý kórsetse, mańyzdy jıynǵa Parlament Májilisiniń depýtattary men memleket jáne qoǵam qaıratkerleri, ǵalymdar, til janashyrlary qatysty.
Forýmdy ashyp sóz alǵan halyqaralyq «Qazaq tili» qoǵamynyń prezıdenti, Parlamenti Májilisiniń depýtaty Berik Ábdiǵalıuly aldaǵy ýaqytta memlekettik tildiń halyqaralyq qatynas salasyndaǵy orny men róli, til mádenıetiniń qalyptasýy, qazaq tiliniń ǵylym tili retinde damýy, memlekettik tildiń qoldanys aıasyn keńeıtýge qatysty jospar-jobalar jasalyp jatqanyna toqtala kelip: «Búgingi basqosý barysynda jastar usynyp otyrǵan birneshe jobany talqylamaqpyz, maqsat – atalǵan jobalar tıimdi bolsa, onyń iske asýyna kómektesý, múmkindik bolsa qarjylaı qoldaý kórsetý» dedi.
Alǵashqy bolyp tanystyrylǵan qazaq tilin úırenýshilerge arnalǵan «Sözwar» sóılesý klýby» jobasy týraly qoǵamnyń vıse-prezıdenti Maksım Rojın áńgimeledi. Astanalyq fılıaldyń Körneki jobasy elimizdegi kórneki jazýlardyń memlekettik tilde qatesiz jazylýyna baǵyttalyp otyr eken. Odan keıin QAZAQ GRAMMAR qazaq mektebi jobasy týraly tehnıkalyq ǵylymdar magıstri, «Bolashaq» baǵdarlamasynyń túlegi, Ońtústik Kalıfornııa Ýnıversıteti (AQSh) túlegi Aıgúl Saǵymbaı aıtyp berdi. Jobanyń ereksheligi – mektep qyzmetinen túsken tabysty memlekettik tildi damytý sharalaryna jumsaıtyn tetik qarastyrylsa, atalǵan mektep orta bilim berý júıesindegi biregeı jańalyq bolmaq, – deıdi joba avtory.
Taǵy bir joba «Sóıle, tilim!» dep atalypty. «Bul joba elimizdiń ózge ult azamattarynyń memlekettik tildi meńgerýine kómektesedi», deıdi «Altyn urpaq/Golden Generation» qazaq jáne aǵylshyn tilindegi halyqaralyq toptyq pán olımpıadasy astanalyq gımnazııasy dırektorynyń orynbasary Ajar Qabdenqyzy.
Jıynda sonymen qatar, «Salamatty urpaq» mektepke deıingi tárbıe men bilim berýge arnalǵan damytýshy oıyndar tásili egjeı-tegjeıli tanystyryldy. Bul jobany kópshilik talqysyna usynǵan Nur-Sultan qalasyndaǵy №46 «Samal» sanatorııalyq balabaqsha meńgerýshisi Balaýsa Qaıyrǵalıevanyń tanystyrýynan túsingenimiz, jobanyń negizgi ózegi – damytýshy oıyndar mektepke deıingi tárbıe men oqytýdyń úlgilik baǵdarlamasynda qarastyrylǵan «Tanym» bilim berý salasynyń oqý qyzmeti jáne «Áleýmet» bilim berý salanyń ekologııalyq negizderi boıynsha jasalypty. «Bul jobanyń mindeti: tabıǵat qubylystaryn baqylaý daǵdylaryn qalyptastyrý jáne týǵan ólkeniń ósimdikteri, jemisteri, aǵashtary, kókónis túrleri, olardy tanyp-bilý uǵymdaryn túsindirý», deıdi Balaýsa Tóleýǵalıqyzy.
Kelesi jobany tanystyrǵan – «Bolashaq» baǵdarlamasynyń túlegi, M.Nárikbaev atyndaǵy Zań akademııasynyń basqarma tóraǵasynyń orynbasary Aınur Baǵdatqyzy onlaın kitap saýdasyndaǵy qazaq tilindegi týyndylardyń azdyǵyn másele etip kóterse, orta bilim berý salasynyń mamany Aıatjan Ahmetjan qazaq tilin oqytý túıtkilderi týraly sóz qozǵady.
Odan keıin AQSh-tyń Soltústik Iýta ýnıversıtetiniń magıstranty Názıra Baıyrbek shet memlekette qazaq tili kýrstaryn uıymdastyrý tóńireginde oı aıtsa, qoǵam belsendisi kásipker Maqsutbek Aıtmaǵambet qazaq tiliniń halyqaralyq arenadaǵy mártebesi jaıynda sóz etti. О́z kezeginde, belgili psıholog Lımana Qoıshıeva til mádenıetiniń urpaq tárbıesindegi alatyn orny týraly oıymen bólisti.
Jıyndy qorytyndylaǵan halyqaralyq «Qazaq tili» qoǵamynyń prezıdenti Berik Ábdiǵalıuly qoǵam maqsaty – memlekettik tildiń ǵylym, mádenıet, ekonomıka, halyqaralyq qatynas tili retinde qoldanylýyna yqpal etý ekenin jetkizip, búgingi sharany uıymdastyrǵan Halyqaralyq «Qazaq tili» qoǵamynyń elordadaǵy fılıalyn basqarýshy qoǵam belsendisi, jýrnalıst-pedagog Qanat Áýesbaıdy kópshilikke tanystyrdy.