Bıyl týǵanyna 100 jyl tolatyn kórnekti qalamger, halyq jazýshysy, Uly Otan soǵysynyń ot-jalynynan ótken, erlik pen eldiktiń mártebesin erekshe kótergen, mahabbat pen meıirimniń keremet jyrshysy atanǵan Ázilhan Nurshaıyqov kezinde Jambyl oblysynyń, Betbaqdalanyń bedireıgen belimen shektesetin, shalǵaıda jatqan aýdany – Moıynqumǵa jıi at izin salýshy edi.
Sebebi Ázekeńdi aýpartkomnyń birinshi hatshysy, ózi de soǵys ardageri ári qurdasy Aıtbaı Nazarbekov árdaıym shyn kóńilmen elge shaqyryp, Almatydan bes júz shaqyrym jerdegi shóldi aımaqqa jetkende qushaǵyn keńinen ashyp, qýana qarsy alatyn.
Sonda jazýshy eki márte Sosıalıstik Eńbek Eri Jazylbek Qýanyshbaevtyń qarapaıymdylyqtyń lebi esse de, taǵylymy mol tamasha áńgimelerin jalyqpaı tyńdap, basqa da aýyl eńbekkerlerimen júzdesetin. Onda túıgen oılarynyń kóbi keıinnen birqatar ádemi áńgime, ocherkterine arqaý boldy ǵoı.
Bir qyzyǵy, Ázekeń Moıynqumǵa kóp saparlatyp júrip Aıtekeń men ol basqarǵan aýdan jaıynda «Raıkom hatshysy» degen shartty ataýmen roman jaza bastaǵan eken. Biraq Keńes ókimetiniń kelmeske ketýi ol eńbeginiń aıaqsyz qalýyna áser etken sekildi...
Endi ótken ǵasyrdyń jetpisinshi jyldarynyń sońynda túsirilgen myna sýretke keleıik. Oń jaqtan ekinshi, árıne, Ázekeń. Al sol jaqtan bastasaq – aýpartkomnyń nasıhat jáne úgit bóliminiń meńgerýshisi (keıinnen úshinshi hatshy da bolǵan), aımaqtyń áleýmettik salasynyń damýyna úlken úles qosqan, marqum Jumabek Orynbaev, Qazaq KSR Joǵarǵy Keńesiniń depýtaty, marqum Aıtbaı Nazarbekov, qurylys salasynyń bilikti mamany, osy aýdandy basqarǵan, keıinnen Joǵarǵy Keńestiń depýtaty bolǵan, marqum Murat Seıdalıev, Moıynqumnyń qadirli qonaǵynyń biri, qyrǵyzdyń belgili aqyn-jyrshysy Estemes Tursynalıev, aýdandaǵy №2006 PMK-ǵa jemisti jetekshilik etip, osy óńirdiń ataǵyn alysqa shyǵarǵan óte isker azamat, marqum Ivan Ekgardt.
Eń shette turǵan kisini anyqtaý múmkin bolmady, balanyń da kim ekeni belgisiz...
Berikbaı QADYQOV,
jýrnalıst
Almaty oblysy,
Qarasaı aýdany