Jýyrda gazetimizde «Sholaqsor taǵy sý astynda qalýy yqtımal» degen taqyryppen maqala jarııalanǵan edi. Bizdiń maqsatymyz – áldekimdi qaralaý emes, apattyń aldyn alý úshin der kezinde áreket etýge shaqyrý bolatyn. Aıtyp aýyz jıǵansha bolǵan joq, óńirde erigen qardyń saldarynan birneshe úı sý astynda qaldy.
Sholaqsor dep otyrǵanymyz – Aqtoǵaı aýdany Jalaýly aýyldyq okrýginiń quramyna kiretin eldi meken. Quzyrly organ mamandary apatty sol jaqtan kútip, bar kúshti sonda jumyldyrdy ma eken, atalǵan aýyldyq okrýgke qarasty Baltasap aýyly nazardan tys qalǵan sııaqty. Onda erigen qardyń sýy bir úıge kirip, ashýǵa mingen úı ıesi bar jaǵdaıdy beınejazbaǵa túsirip, áleýmettik jeli arqyly muńyn shaqty. «Kúnniń kúrt jylynatynyn bilmeı me, traktor jibermeı me?» dep keıidi ol. Bul jaıttan habardar bolǵan aýyldyq okrýg ákimi Azamat Medetov eldi mekenge baryp, arnaıy tehnıkalar arqyly úı aýlasyna jınalǵan qar sýyn sorǵylaý jumystary júrgizilgenin málimdedi. Turǵyn úılerge eshqandaı qaýip joq ekenine sendirdi. Aýdan ákimi Qarshyǵa Arynov ta resmı jaýabyn usyndy.
– Áleýmettik jeli arqyly taraǵan beınejazbadaǵy oqıǵanyń oryn alǵany rastaldy. Kúni keshe quzyrly organ ókilderimen birlesip, Jalaýly jáne Jolboldy aýyldyq okrýgteri aýmaǵyndaǵy sý basý qaýpi bar eldi mekenderdi aralap shyqtyq. Nátıjesinde, Baltasap jáne Shilikti eldi mekenderinde úı aýlalaryn erigen qar sýy basý qaýpi bar ekeni anyqtaldy. Atalǵan aýyldarǵa tehnıkalar jóneltilip, táýlik boıy aýysym boıynsha tıisti jumystar atqarylýda, – dedi aýdan basshysy.
Negizgi qaýip kórshiles ornalasqan Aqmola oblysyndaǵy Sileti sý qoımasynan tónetini jasyryn emes. Qoımadan sý bosatylǵan ýaqytta jaıylǵan sý Jalaýly aýyldyq okrýginiń aýmaǵyna deıin jetip, jergilikti turǵyndardy qorqynyshta ustaıtyny ras. Osy oraıda oblys ákiminiń birinshi orynbasary Oleg Krýk ta jedel jetip, jaǵdaıdy jiti nazarǵa aldy. Búginde Sileti ózeninde muzdy kesý jumystary jalǵasýda.
Ázirge aqtoǵaılyqtardyń uıqysy tynysh. Al Pavlodar aýdany Rojdestvenko aýylynyń turǵyndaryna úsh uıyqtasa da sýdyń astynda qalatyndary túsine kirmese kerek. Buryn kóktemde sý basý qaýpi bar aımaqtardyń tiziminde bolsa da, keıingi jyldary jaǵdaı turaqty edi. Munda eki kúnde 30 aýlany sý basyp, Abaı kóshesi 67 jáne 39/2 mekenjaıynda ornalasqan 2 úıge sý kirgen. Oblys ákimi Ábilqaıyr Sqaqov úıi sýdyń astynda qalǵan kópbalaly otbasynyń úıine bardy. Úı jerdiń tómengi bóliginde ornalasqan eken.
«Búginde aýyl turǵyndary qaýipsizdikte. Sý basqan úıdiń otbasyna kómek kórsetilip, keltirilgen zalal óteletin bolady. Sý kólemi tómendeı bastady, barlyq qajetti kúshter men quraldar jumysqa qosyldy. Qaıta sý basý qaýpi joq», dedi oblys ákimi.
Osy jaǵdaılardan keıin oblystyq ákimdikte sý tasqyny boıynsha shuǵyl keńes ótti. Belgili bolǵandaı, Aqsý aýyldyq aımaǵynda da 15 úıdi sý basý qaýpi oryn alǵan. Ásirese Bereke aýylyndaǵy jeti aýlany sý basý qaýpi joǵary bolyp, qutqarýshylar men ákimdik qyzmetkerleri der kezinde qaýiptiń betin qaıtarypty. Oblys ortalyǵyndaǵy Sátpaev, Gagarın, Qamzın, akademık Shókın, Krýpskaıa, «KazPravda» jáne Vorýshın kóshelerindegi jol ýchaskeleri sý astynda qalyp, kommýnaldyq qyzmetter erigen qar sýyn sorý jumystaryn tolyqtaı aıaqtaǵan.
Qazir áleýmettik jelilerde qala jáne aýdan ákimderi belsendi. Sý basý qaýpi bar aımaqtarda júrgenin jarııalap, jaǵdaıdyń turaqty ekenin aıtýda. Dese de, sońǵy bir-eki kúnde birneshe úıdiń sý astynda qalýy áli de bolsyn saqtyq sharalaryn durys uıymdastyrý kerek ekenin aıqyndap berdi. «Qazgıdromet» kásiporny mamandarymen tyǵyz baılanys ornatyp, aýa raıynyń kúrt jylynatynynan habardar bolsa, oqys oqıǵalar oryn almas pa edi?! Ne desek te, muny eskertý dep qabyldaǵan jón. Bosańsýǵa jol joq!
Pavlodar oblysy