Búgingi medısınanyń ishinara bolsa da adam tanymastaı ózgergenin moıyndaý kerek. Ýaqyttyń talabyna saı qyzmet etýdi basty maqsat qylǵan bul saladaǵy oń ózgerister, serpindi jobalar súısindirmeı qoımaıdy. Jasyratyny joq, qazirgi tańda medısınalyq qyzmetke tabysty kásiptiń kózi retinde qaraý týrasyndaǵy kózqarastyń da beti beri qaraǵan. Iаǵnı álemdik úrdistiń kóshine ilesken bizdiń medısınany da jarqyn bolashaq kútip tur dep senimmen aıtýǵa bolady.
Joǵaryda aıtylǵan ózgeristerge mysaldy alystan izdep keregi de joq. Kenshiler astanasyndaǵy «Mıras» atty jekemenshik klınıkanyń ashylǵanyna bıyl tórt jylǵa jýyq ýaqyt boldy. Búginde bul medısınalyq mekeme materıaldyq-tehnıkalyq turǵyda jaraqtandyrylý, bilikti kadrlarmen tolyqtyrylý jáne sapaly qyzmet kórsetý jaǵynan kósh bastaýshylar qatarynda tur.
Mine, osy jumystardyń bárin úılestirip otyrǵan bilikti de tájirıbeli basshy, Densaýlyq saqtaý salasynyń úzdigi Roza Sábıtollaqyzy Razıeva dep senimmen aıtýǵa bolady. Medısına salasynyń maıtalman mamany bul klınıkany qabyrǵasy qalanǵannan beri basqaryp keledi. Al oǵan deıin Qaraǵandydaǵy №1 emhananyń dırektory bolyp 2004 jyldan bastap 2020 jylǵa deıin jemisti eńbek etti.
Roza Sábıtollaqyzy basqarǵan jyldary atalǵan emhana respýblıkadaǵy top-5 emdeý mekemeleriniń qataryna endi. Al 2013 jyly №1 emhana oblysta alǵashqylardyń biri bolyp medısınalyq uıymdardyń halyqaralyq akkredıtasııasynan ótken bolatyn.
Jalpy, Roza Razıevanyń «Mıras» klınıkasynyń dúnıege kelýine tikeleı qatysy bar. «2018 jyly maǵan jeke kásipker Dáýlet Myrzaǵalıev esimdi azamat kelip jolyqty, – dep eske alady Roza Sábıtollaqyzy. – Ol óziniń medısına salasyna ınvestısııa salǵysy keletinin aıtyp, menen aqyl-keńes surady. Maǵan bul ıdeıa qatty unady. Sodan shamam kelgenshe ol azamatqa ózimniń oı-pikirimdi aıtyp, aqyl-keńesimdi berip, medısına salasynyń qyr-syry týraly biletin bar maǵlumatpen bólistim. Dáýlet Myrzaǵalıev sharýanyń ebin biletin kásipker bolyp shyqty. Ol óziniń áriptesterimen birge az ǵana ýaqyttyń ishinde úsh qabatty ǵımaratty salyp, klınıkany paıdalanýǵa berdi».
Aıta ketý kerek, kásipker medısınalyq nysandy memleket-jekemenshik áriptestigi negizinde emes, taza óz qarajatyna saldy. Ǵımarat qurylysy aıaqtalǵan soń, klınıka ishi zamanaýı medısınalyq qural-jabdyqtarmen jaraqtandyryldy. Sonan keıingi másele mekemege basshy taýyp, ishin medısınalyq qyzmetkerlermen tolyqtyrý boldy. Álbette, tańdaý birden Roza Razıevadaı uıymdastyrýshylyq qabileti zor, óz isiniń bilgir mamanyna túsken edi.
«Mıras» klınıkasyna kelerde tájirıbeli basshy quryltaıshylarǵa birqatar talap qoıdy. Medısınalyq qyzmetkerlerge arnalǵan áleýmettik paket tolyq saqtalmasa, bul klınıkaǵa birde-bir mamannyń kelmeıtini aıtyldy. Osy jáne budan da basqa talap-tilekti quryltaıshylar qup kórgen soń, Roza Sábıtollaqyzy qyzmetke kirisken. Bir qyzyǵy, №1 emhananyń ujymy bastyǵyna baýyr basyp ketken bolý kerek, túgeldeı jańa nysan – «Mıras» klınıkasynda jumys isteýge tilek bildirdi. Bir sózben aıtqanda, emhana klınıkaǵa tutastaı kóship kelgen edi.
Roza Razıevanyń bólimshesi bir jylǵa jýyq ýaqyt mekemeni jalǵa alyp jumys istedi. Al kelesi jyly klınıka óz aldyna jeke shyqty. Tipti ǵımarat ishi tarlyq etkennen keıin, quryltaıshylar tez arada ǵımaratty bıiktetip, taǵy bir qabatty salyp tastady. Sonyń nátıjesinde qosymsha qural-jabdyqtar qoıylyp, 26 oryndyq kúndizgi stasıonar, birqatar kabınetter ashýǵa múmkindik týdy.
Bul kúnde «Mıras» klınıkasy qoljetimdi qadamdyq emhana qaǵıdatyna tolyqtaı saı keletin jáne sol talapqa jaýap beretin medısınalyq mekemege aınaldy. Klınıka jumysyn bastaǵan jyly oryn tepken aýmaqtaǵy 12 ýchaske boıynsha 22 myń adamǵa qyzmet kórsetse, qazirgi ýaqytta tirkelgenderdiń sany edáýir kóbeıgen.
Qazirgi tańda «Mıras» klınıkasynda 190-ǵa jýyq adam jumys isteıdi. Onyń ishinde 40 dáriger, 96 medbıke bar. Medısınalyq mekemeniń qaramaǵynda úsh jedel járdem kóligi, feldsherlik brıgada turǵyndarǵa ýaqytpen sanaspaı qyzmet kórsetedi.
Osy oraıda, turǵyndarǵa medısınalyq sapaly qyzmet kórsetip, olardan tek alǵys alyp júrgen mamandardy ataı ketý artyq bolmas edi. Klınıka dırektorynyń orynbasary Aıjan Rysbekova, arnaýly medısınalyq kómek bólimshesiniń meńgerýshisi Baıan Áýbákirova, bólimshe meńgerýshisi – jalpy tájirıbe dárigeri Indıra Janádilova, bas medbıbi Roza Arystanova, hırýrg Sáýle Erǵalıeva, ýchaskelik dárigerler Baqytgúl Dosmaǵambetova, Ferýza Abdýlla, Almagúl Moldabaeva, Altynaı Meldibekova, Iаroslav Iskra, gınekolog Nurgúl Jazybekova, aǵa býhgalter Perızat Saǵyndyqova, aǵa baǵdarlamashy Aıdyngúl Baqtybaeva jáne aǵa medbıke Elmıra Ádilova syndy óz isiniń kásibı mamandary bul kúnde «Mıras» klınıkasynyń mereıin asyryp júr.
Áleýmettik paket demekshi, quryltaıshylar bergen ýádede turyp, aıtylǵan tilek-talaptyń bárin de oryndady. Tipti keıbir jaǵdaılarda qyzmetkerlerge qosymsha kómek túrlerin de qarastyrdy. Mysaly, óziniń mindetine jaýapkershilikpen qarap, jumysyn jaqsy istegen qyzmetkerlerge qosymsha aqy tólene bastady. Jas mamandarǵa da túrli qamqorlyq kórsetilip turady.
– Bizdiń klınıkada qajetti medısınalyq qyzmetkerlerdiń bári bar. Jas mamandar da kelip jatady. Degenmen olardyń arasynda rezıdentýraǵa ketip qalatyndary da bolady. Sol kezderde kadr tapshylyǵy sezilip qalady, – deıdi Roza Sábıtollaqyzy.
«Mıras» klınıkasynyń quryltaıshylary istiń qııýyn tapsa, medısına salasy men bıznestiń qatar ómir súrip, birge damıtynyn dáleldep berdi. Aınaldyrǵan eki-úsh jyldyń ishinde salynǵan ınvestısııa jemisin berip, paıdasyn kórsete bastady. Mysaly, tabystyń belesine shyqqan kásipkerler Qaraǵandynyń irgesindegi Ýzenka eldi mekeninde sol mańaıdaǵy 16 myńdaı turǵynǵa qyzmet kórsetetin emhana salyp, ishin joǵary standarttarǵa jaýap beretin medısınalyq qural, apparattarmen jabdyqtap, mamyr aıynda paıdalanýǵa bermekshi.
Qazirgi kezde sarapshylar «Mıras» syndy zatynyń zamanaýı sıpaty súısintetin klınıkalardyń kóp bolǵany bizdegi medısınanyń mereıin ósirip, abyroı-bedelin kótere túsedi degen pikir aıtady. Ol ras, óıtkeni sapaly jáne joǵary dárejedegi medısınalyq qyzmetke degen adam balasynyń suranysy – kún tártibinen ómiri túspeıtin tolǵaqty taqyryptyń biri.